ប្រទេសប៉ាគីស្ថាន៖ មន្ត្រីយោធាបាននិយាយនៅក្នុងសេចក្តីថ្លែងការណ៍មួយកាលពីយប់ថ្ងៃពុធថា ទាហាន១២នាក់ និងភេរវករ៦នាក់ស្លាប់ក្នុងការប៉ះទង្គិចគ្នារវាងកម្លាំងសន្តិសុខ និងក្រុមសកម្មប្រយុទ្ធនៅក្នុងខេត្តខាយប័រផាកថុនវ៉ា ភាគពាយ័ព្យប្រទេសប៉ាគីស្ថាន នៅថ្ងៃអង្គារនេះ។
បណ្តាញទំនាក់ទំនងសាធារណៈអន្តរសេវាកម្មហៅកាត់ថា (ISPR) ដែលជាដៃគូរបស់ប្រព័ន្ធផ្សព្វផ្សាយកងទ័ពប៉ាគីស្ថានបានលើកឡើងនៅក្នុងសេចក្តីថ្លែងការណ៍មួយថា ហេតុការណ៍នេះបានកើតឡើងក្នុងស្រុកបាននូ ជាកន្លែងដែលក្រុមភេរវករប៉ុនប៉ងវាយប្រហារលើបុស្ត៍ត្រួតពិនិត្យរួមគ្នារបស់កងទ័ពប៉ាគីស្ថាន និងកម្លាំងសហព័ន្ធកងទ័ពប៉ារ៉ា។
សេចក្តីថ្លែងការណ៍មានខ្លឹមសារបន្ថែមថា ការវាយប្រហារនេះបានបង្កឱ្យមានការបាញ់គ្នាទៅវិញទៅមក ដែលក្នុងនោះភេរវករ៦នាក់ត្រូវបានបាញ់ស្លាប់ ហើយការប៉ុនប៉ងចូលក្នុងបុស្ត៍ត្រួតពិនិត្យត្រូវបានរារាំងដោយកងទ័ពយ៉ាងមានប្រសិទ្ធិភាព ដែលជាហេតុបង្ខំឱ្យក្រុមភេរវករបើករថយន្តផ្ទុកគ្រឿងផ្ទុះបុកជញ្ជាំងបុស្ត៍យាមល្បាត។
ISPR បញ្ជាក់បន្ថែមទៀតថា ការបំផ្ទុះគ្រាប់បែកអត្តឃាតបានធ្វើឱ្យជញ្ជាំងរលំ និងបំផ្លាញហេដ្ឋារចនាសម្ពន្ធដែលនៅជាប់គ្នា ដែលជាលទ្ធផលបណ្តាលឲ្យមានទាហានស្លាប់ ។
សូមបញ្ជាក់ផងដែរថា ប្រតិបត្តិការបោសសម្អាតកំពុងត្រូវបានធ្វើឡើងនៅក្នុងតំបន់នោះ៕
ប្រភព Xinhua ចុះផ្សាយថ្ងៃទី២០ ខែវិច្ឆិកា ឆ្នាំ២០២៤
