ប្រទេសយ៉េមែន៖ ក្រុមហ៊ូធីរបស់ប្រទេសយ៉េម៉ែនកាលពីព្រឹកថ្ងៃសុក្របានអះអាងទទួលខុសត្រូវចំពោះការវាយប្រហារដោយមីស៊ីលផ្លោងមួយគ្រាប់ទៅលើភាគខាងត្បូងទីក្រុងតែលអាទីវ ដែលការអះអាងនេះធ្វើឡើងដោយអ្នកនាំពាក្យយោធាហ៊ូធីនៅក្នុងសេចក្តីថ្លែងការណ៍ព័ត៌មានទូរទស្សន៍។
“ដើម្បីគាំទ្រដល់ប្រជាជនប៉ាឡេស្ទីន និងឆ្លើយតបទៅនឹងការសម្លាប់រង្គាលដោយអ៊ីស្រាអែលនៅតំបន់ហ្កាហ្សា កងកម្លាំងរបស់យើងបានធ្វើប្រតិបត្តិការជាច្រើនលើកកំណត់គោលដៅលើទីតាំងយោធាអ៊ីស្រាអែលនៅភាគខាងត្បូងទីក្រុងតែលអាទីវ ដោយប្រើគ្រាប់មីស៊ីលផ្លោងល្បឿនលឿនមួយគ្រាប់” នេះបើតាមអ្នកនាំពាក្យយោធាហ៊ូធី លោក យ៉ាហយ៉ា សារៀ និយាយនៅក្នុងសេចក្តីថ្លែងការដែលចាក់ផ្សាយដោយទូរទស្សន៍អាល់ម៉ាស៊ីរ៉ា។
“នេះគឺជាប្រតិបត្តិការលើកទី២ក្នុងរយៈពេល២៤ម៉ោង” លោកនិយាយនេះគឺចង់សំដៅទៅលើការវាយប្រហារដោយគ្រាប់មីស៊ីលផ្លោងលើកទី១ដែលក្រុមនេះបាននិយាយថាមានគោលដៅលើអាកាសយាន្តដ្ឋាន បេន ហ្គួរៀន ក្នុងទីក្រុងតែលអាទីវ ដែលអ៊ីស្រាអែលបានប្រកាសថាពួកគេបានបាញ់ស្ទាក់បាន។”
លោកបានរំលឹកឡើងវិញថា ក្រុមនេះនឹងបន្តការវាយប្រហារលើអ៊ីស្រាអែល និងកប៉ាល់របស់ពួកគេរហូតទាល់តែសង្គ្រាមនៅហ្កាហ្សាចប់ ហើយច្រកឆ្លងកាត់បើកដំណើរការឡើងវិញដើម្បីអនុញ្ញាតឱ្យជំនួយចូល។
នៅព្រឹកថ្ងៃព្រហស្បតិ៍ ក្រុមហ៊ូធីក៏បានអះអាងផងដែរថាបានបើកការវាយប្រហារតាមអាកាសលើនាវាផ្ទុកយន្តហោះ USS Harry S. Truman នៅភាគខាងជើងសមុទ្រក្រហម ដែលជាការវាយប្រហារលើកទី៥ ចាប់តាំងពីថ្ងៃសៅរ៍។
ជាការឆ្លើយតប យោធាអាមេរិកបានបន្តការវាយប្រហារតាមអាកាសឡើងវិញទៅលើទីតាំងក្រុមហ៊ូធីតាំងពីថ្ងៃសៅរ៍ ដោយអះអាងថាយុទ្ធនាការរបស់ពួកគេមានគោលបំណងការពារការដឹកជញ្ជូនតាមនាវាអន្តរជាតិ។ ការវាយប្រហារថ្មីតាមអាកាសរបស់សហរដ្ឋអាមេរិកបានសម្លាប់មនុស្សរាប់រយនាក់ នេះបើតាមអាជ្ញាធរសុខាភិបាលដែលគ្រប់គ្រងដោយក្រុមហ៊ូធី។
ក្រុមហ៊ូធីបានគ្រប់គ្រងតំបន់ដ៏ធំរបស់ប្រទេសយ៉េម៉ែន ក្នុងនោះមានកំពង់ផែយុទ្ធសាស្ត្រហ៊ូដេសដាហ និងរដ្ឋធានីសាណា បន្ទាប់ពីសង្គ្រាមស៊ីវិលបានផ្ទុះឡើងនៅក្នុងឆ្នាំ២០១៤៕
