សាធារណរដ្ឋនីហ្សេ៖ យ៉ាងហោចណាស់ជនស៊ីវិល៤៤នាក់ត្រូវបានសម្លាប់ និង១៣នាក់ផ្សេងទៀតរងរបួសក្នុងការវាយប្រហារភេរវកម្មកាលពីថ្ងៃសុក្រក្នុងភូមិមួយក្នុងទីក្រុងភាគខាងលិច ធីឡាបឺរ៉ី របស់ប្រទេសនីហ្សេ នេះបើតាមអាជ្ញាធរនិយាយនៅថ្ងៃបន្ទាប់។
លោក ម៉ូហាមេដ ថូមបា រដ្ឋមន្ត្រីក្រសួងមហាផ្ទៃបាននិយាយនៅក្នុងសេចក្តីថ្លែងការណ៍មួយថា វាជាការវាយប្រហារដ៏ព្រៃផ្សៃដែលធ្វើឡើងដោយក្រុមភេរវករនៃក្រុមសកម្មប្រយុទ្ធរដ្ឋអ៊ីស្លាមនៅហ្គីតថឺរ សាហារ៉ា (ISGS)។
សេចក្តីថ្លែងការណ៍មានខ្លឹមសារបន្ថែមថា ក្រុមភេរវករប្រដាប់អាវុធធន់ធ្ងន់បានសម្លាប់រង្គាលនៅឯព្រះវិហារមួយកន្លែងនៅក្នុងខេត្តហ្វេមប៊ីថា ក្នុងស្រុកកូកូរ៉ូនៅម៉ោងប្រមាណ១៤:០០នាទី នៅពេលដែលអ្នកកាន់សាសនាអ៊ីស្លាម កំពុងធ្វើពិធីបួងសួងជុំគ្នានៅថ្ងៃសុក្រ ហើយបានដុតផ្សារ និងផ្ទះជាច្រើនខ្នងក្នុងពេលពួកគេដកថយ។
មនុស្ស៤នាក់ដែលរងរបួសស្ថិតក្នុងស្ថានភាពធ្ងន់ធ្ងរ។ នៅក្នុងសេចក្តីថ្លែងការណ៍នោះ លោកថូមបា បានប្តេជ្ញាថានឹងតាមដាន និងកាត់ទោសជនល្មើស អ្នកសមគំនិត អ្នករៀបចំផែនការ និងអ្នកសហការ។
ស្រុកកូកូរ៉ូ ស្ថិតនៅតំបន់ព្រំដែនត្រីកោណ ជាទីតាំងដែលប្រទេសនីហ្សេ មានព្រំប្រទល់ជាប់ប្រទេសសូម៉ាលី និងប៊ូគីណាហ្វាសូ។ ទីតាំងនេះបានក្លាយជាកន្លែងដែលអសន្តិសុខក្នុងរយៈពេលប៉ុន្មានឆ្នាំចុងក្រោយនេះ ដែលញាំញីដោយការវាយប្រហារពីក្រុមជីហាដផ្សេងៗគ្នា៕
