ប្រទេសអ៊ីស្រាអែល៖ កងទ័ពការពារជាតិអ៊ីស្រាអែល (IDF) បាននិយាយនៅថ្ងៃសុក្រថា ខ្លួនបានបាញ់ស្ទាក់ចាប់គ្រាប់មីស៊ីលមួយគ្រាប់ដែលបាញ់ចេញពីប្រទេសយ៉េម៉ែនមុនពេលគ្រាប់នោះចូលដល់ទឹកដីអ៊ីស្រាអែល។ សេវាសង្គ្រោះបន្ទាន់របស់អ៊ីស្រាអែល ម៉ាហ្កេន ដេវីដ អាដុំ (MDA) បានរាយការណ៍ថា មិនមានអ្នកស្លាប់និងរបួស ឬមានការខូចខាតណាមួយនោះទេ។
ការបាញ់គ្រាប់មីស៊ីលបង្កឱ្យមានសំឡេងស៊ីរ៉ែនការពារដែនអាកាសនៅទូទាំងតំបន់ភាគកណ្តាលប្រទេសអ៊ីស្រាអែលមានដូចជាទីក្រុងយ៉េរូសាឡឹម និងក្រុងតែលអាទីវ ដែលជំរុញឲ្យមនុស្សរាប់លាននាក់ស្វែងរកទីជម្រក។
ប៉ូលិសអ៊ីស្រាអែលបាននិយាយថា មន្ត្រីបានធ្វើការស្វែងរកទីតាំងដែលអាចរងនូវការវាយប្រហារទាំងឡាយបានដើម្បីធានាសុវត្ថិភាពសាធារណៈ។
បន្ទាប់ពីការបាញ់គ្រាប់មីស៊ីល វេបសាយព័ត៌មានវ៉ាណិតរបស់អ៊ីស្រាអែលបានរាយការណ៍ថា យន្តហោះអ៊ីស្រាអែលមួយគ្រឿងដែលហោះចេញពីក្រុងអាតែនឆ្ពោះទៅអាកាសយាន្តដ្ឋានបេន ហ្គួរៀន ជិតទីក្រុងតែលលអាទីវ បានហោះក្រឡឹងជុំវិញមុនពេលទទួលការអនុញ្ញាតឲ្យចុះចត។
នេះគឺជាការបាញ់គ្រាប់មីស៊ីលលើកទី៣ចេញពីប្រទេសយេម៉ែនចូលអ៊ីស្រាអែល ចាប់តាំងពីមានការប្រយុទ្ធគ្នានៅហ្កាហ្សាបន្តឡើងវិញកាលពីថ្ងៃអង្គារ៕
