ប្រទេសអ៊ីរ៉ង់៖ នៅថ្ងៃព្រហស្បតិ៍នេះប្រទេសអ៊ីរ៉ង់បានថ្កោលទោសចំពោះការវាយប្រហារភេរវកម្មដោយគ្រាប់បែកអត្តឃាតលើគោលដៅរថយន្តរបស់ប៉ូលិសនៅខេត្តប៉ាឡូជីស្ថាន ភាគនិរតី ប្រទេប៉ាគីស្ថាន។
នៅក្នុងសេចក្តីថ្លែងការណ៍ អ្នកនាំពាក្យក្រសួងការបរទេសអ៊ីរ៉ង់ អ៊ីសម៉ែល បាកហែ បានថ្កោលទោសការវាយប្រហារ ដែលបានកើតឡើងនៅក្នុងរដ្ឋធានីកេតា។
ការផ្ទុះដែលកើតឡើងដោយគ្រឿងផ្ទុះកែច្នៃ បានប៉ះត្រូវរថយន្តល្បាតរបស់ប៉ូលិសក្នុងតំបន់ផ្សារដ៏មមាញឹក បានសម្លាប់មនុស្សយ៉ាងហោចណាស់២នាក់ និងបង្ករបួសស្នាមដល់មនុស្ស២១នាក់ ក្នុងនោះមានទាំងមន្ត្រីប៉ូលិសជាច្រើននាក់ផងដែរ។
ដោយបញ្ជាក់ឡើងវិញនូវជំហររឹងមាំរបស់អ៊ីរ៉ង់ប្រឆាំងនឹងអំពើភេរវកម្ម និងលទ្ធិជ្រុលនិយមដ៏ឃោរឃៅនេះ លោក បាកហែ បានអំពាវនាវឱ្យមានការពង្រឹងកិច្ចសហប្រតិបត្តិការក្នុងតំបន់និងអន្តរជាតិដើម្បីកម្ចាត់អំពើរភេរវកម្មនិងនាំអ្នកដែលជាប់ពាក់ព័ន្ធមកទទួលទោស។
ពុំទាន់មានក្រុមណាមួយអះអាងទទួលខុសត្រូវចំពោះការវាយប្រហារនេះទេ៕
