ប្រទេសឥណ្ឌា៖ ប៉ូលិសនិយាយថា ក្រុមឧទ្ទាមប្រដាប់អាវុធណាហ្សាលយ៉ាងហោចណាស់១៦នាក់ត្រូវបានសម្លាប់ ចំណែកឯប៉ូលិស២នាក់រងរបួសនៅថ្ងៃសៅរ៍ក្នុងការបាញ់ប្រហារគ្នាយ៉ាងសាហាវ នៅរដ្ឋឆាតធីសហ្កា ភាគកណ្តាលប្រទេសឥណ្ឌា។
ជម្លោះប្រដាប់អាវុធរវាងក្រុមឧទ្ទាមប្រដាប់អាវុធណាហ្សាល និងកងកម្លាំងសមត្ថកិច្ចចម្រុះរបស់ប៉ូលិស និងទាហានប៉ារ៉ាបានផ្ទុះឡើងនៅតំបន់គេរ៉ាឡាផាល ស្រុកសូកម៉ា ចម្ងាយប្រមាណ ៤២៥គីឡូម៉ែត្រ ភាគខាងត្បូងទីក្រុងរ៉ៃផួរ របស់រដ្ឋឆាតធីសហ្កា។
យោងតាមមន្ត្រីជាន់ខ្ពស់ប៉ូលិសលោក ភី ស៊ុនដារ៉ាច បានឲ្យដឹងថា អាវុធមួយចំនួនធំក្នុងនោះរួមមាន កាំភ្លើងវែង និងគ្រាប់រំសេវដ៏ច្រើនត្រូវបានរឹបអូសពីក្រុមឧទ្ទាមណាហ្សាលដែលត្រូវបានសម្លាប់ទាំងនោះ។
លោកបាននិយាយថា “សាកសពពួកឧទ្ទាមណាហ្សាល១៦នាក់ត្រូវបានរកឃើញ ហើយប្រតិបត្តិការរុករកបន្ថែមគឺកំពុងដំណើរការក្នុងតំបន់នោះ”។
កាលពីសប្តាហ៍មុន ក្រុមណាហ្សាល៣០នាក់ និងប៉ូលិសស្លាប់ក្នុងការបាញ់គ្នាយ៉ាងសាហាវចំនួន២លើកផ្សេងគ្នា។
របាយការណ៍ព័ត៌មានបាននិយាយថា ដោយតាំងពីមានចំណាត់ការកាលពីថ្ងៃសៅរ៍ ក្រុមសកម្មប្រយុទ្ធណាហ្សាល១៣២នាក់ត្រូវបានសម្លាប់ក្នុងរដ្ឋចាប់តាំងពីដើមឆ្នាំនេះ៕
