ប្រភពព័ត៌មានពី Reuters ចេញផ្សាយថ្ងៃទី០២ ខែកក្កដា ឆ្នាំ២០១៨
ក្រុមឃ្លាំមើលសហរដ្ឋអាមេរិក (SITE) និយាយនៅថ្ងៃចន្ទថា ក្រុមអ៊ីស្លាមដែលមានទំនាក់ទំនងជាមួយក្រុមអាល់កៃដាក្នុងប្រទេសម៉ាលី ទទួលខុសត្រូវចំពោះការវាយប្រហារលើកងទ័ពបារាំងនៅភាគខាងជើងក្រុង Gao។ជនស៊ីវិលចំនួន០៤នាក់ស្លាប់ និងទាហានបារាំងចំនួន០៤នាក់ រងរបួសនៅក្នុងការវាយឆ្មក់នៅថ្ងៃអាទិត្យ។
ប្រភពបន្ថែមថាការវាយប្រហារគឺជាសារមួយទៅកាន់ប្រធានាធិបតីបារាំងលោក Emmanuel Macron ចំពេលដំណើរទស្សនកិច្ចរបស់លោកទៅកាន់ប្រទេស Mauritania នៅថ្ងៃចន្ទ។
លោក Macron មានប្រសាសន៍ថា នៅពេលលោកទៅដល់ទីក្រុង Nouakchott ប្រទេស Mauritania នៅថ្ងៃចន្ទ ទាហានបារាំងជាច្រើននាក់ដែលរងរបួសក្នុងក្រុង Gao ត្រូវគេបញ្ជូនទៅប្រទេសបារាំង។ លោកបន្តថា លោកនឹងជួបប្រជុំគ្នាជាមួយសហភាពអាហ្វ្រិករួមមាន ប្រធានាធិបតីMali, Niger, Burkina Faso, Chad និងMauritania ដែលជាសមាជិក G5 Sahel បង្កើតឡើងដើម្បីប្រយុទ្ធប្រឆាំងនឹងក្រុមសកម្មប្រយុទ្ធអ៊ីស្លាម។
ប្រទេសមហាអំណាចលោកខាងលិចរួមមានប្រទេសបារាំង និងសហរដ្ឋអាមេរិកផ្តល់មូលនិធិដល់សមាជិកG5 ដើម្បីដោះស្រាយបញ្ហាលើពួកជីហាដ។ ប៉ុន្តែកម្លាំងប្រតិបត្តិកាមានការយឺតយ៉ាវ ដោយមានការពន្យារពេលក្នុងការចំណាយ និងខ្វះការសំរបសំរួលពីប្រទេសទាំង៥។
អំពើហឹង្សាធ្វើឡើងដោយសកម្មប្រយុទ្ធអ៊ីស្លាមរីករាលដាលនៅក្នុងតំបន់ Sahel ដែលមានប្រជាជនរស់នៅតិចតួចក្នុងរយៈពេលប៉ុន្មានឆ្នាំចុងក្រោយនេះ ជាមួយនឹងក្រុមដែលមាន ទំនាក់ទំនងទៅនឹងក្រុមអាល់កៃដានិងរដ្ឋអ៊ីស្លាមដោយប្រើតំបន់កណ្តាល និងភាគខាងជើងប្រទេសម៉ាលីជាការចាប់ផ្តើមសម្រាប់ការវាយប្រហារនៅទូទាំងតំបន់។
