ប្រភពព័ត៌មានRT ផ្សាយថ្ងៃទី២១ ខែមករា ឆ្នាំ២០១៩
សមាជិកអង្គភាពប៉ូលិសប្រឆាំងអំពើភេរវកម្មជាច្រើននាក់ត្រូវចាប់ខ្លួនក្នុងប្រទេសប៉ាគីស្ថានក្រោយពីមានវីដេអូបង្ហាញថា មន្រ្តីប៉ូលិសទាំងនោះបាញ់អ្នកបើកឡាន និងសម្លាប់មនុស្ស៤ នាក់រួមទាំងក្មេងស្រីជំទង់។
នាយកដ្ឋានប្រឆាំងភេរវកម្មប៉ាគីស្ថាន (CTD) និយាយថា ការសម្លាប់មនុស្សកើតឡើងក្នុងទីក្រុង Sahiwal ក្នុងខេត្ត Punjab ។ ហេតុការណ៍នេះកើតឡើងក្រោយជនសង្ស័យថាជាភេរវករបើកការបាញ់ប្រហារលើមន្រ្តីប៉ូលិសដែលកំពុងព្យាយាមចាប់ខ្លួនគាត់។ ប៉ុន្តែវីដេអូនៅកន្លែងឧបទ្ទវហេតុប្រាប់រឿងរ៉ាវផ្សេងគ្នាបង្កឱ្យមានកំហឹង និងធ្វើឱ្យហេតុការណ៍នេះក្លាយជារឿងអាស្រូវថ្នាក់ជាតិដ៏ធំមួយក្នុងប្រទេសប៉ាគីស្ថាន។
មនុស្សចំនួន៤នាក់ ត្រូវមន្រ្តី CTD បាញ់សម្លាប់នៅថ្ងៃសៅរ៍ដោយស្គាល់អត្តសញ្ញាណឈ្មោះ Mohammad Khalil ជាម្ចាស់ហាងលក់គ្រឿងទេស ប្រពន្ធរបស់គាត់ឈ្មោះ Nabia កូនស្រីរបស់ពួកគេឈ្មោះ Areeba និងមិត្តភក្តិគ្រួសារឈ្មោះ Zeeshan Javed។
រថយន្តបើកបរដោយ Javed ត្រូវប៉ូលិសឃាត់ខ្លួន ហើយប៉ូលិសអះអាងថា ពួកគេកំពុងធ្វើសកម្មភាព។ បើតាមព័ត៌មានពីភ្នាក់ងារចារកម្មនិយាយថា បុរសនោះគឺជាក្រុមជីហាដដែលស្មោះត្រង់នឹងក្រុមភេរវជនដែលជារដ្ឋអ៊ីស្លាម។ ដំបូងប៉ូលិសនិយាយថាលោក Javed គឺជាភេរវករដែលទទួលបានការបណ្តុះបណ្តាលប្រើប្រាស់ក្រុមគ្រួសារនេះធ្វើជាខែល ហើយបើកការបាញ់ប្រហារទៅលើមន្ត្រីប៉ូលិសដែលបាញ់ និងសម្លាប់មនុស្សនៅក្នុងឡាន។
សាក្សីនិយាយថា ប៉ូលិសដេញតាមរថយន្តហើយបង្ខំឱ្យឈប់។ ក្រោយមកពួកគេទាញក្មេងតូចៗបីនាក់ចេញពីឡាន និងយកទៅឡានប៉ូលិសហើយបាញ់សម្លាប់មនុស្សនៅសល់ប៉ុន្មានដែលនៅខាងក្នុងឡាន។ រូបភាពនៅកន្លែងឧបទ្ទវហេតុថតដោយអ្នកឈរមើលគាំទ្រឯកសាររបស់សាក្សី។
សាច់ញាតិបុរសទាំងពីរនាក់ដែលស្លាប់ក្នុងហេតុការណ៍នេះបដិសេធថា គ្មាននរណាម្នាក់ក្នុងចំណោមពួកគេមានទំនាក់ទំនងជាមួយនឹងក្រុមជីហាដទេ។ វីដេអូនេះផ្សាយដោយប្រព័ន្ធផ្សព្វផ្សាយប៉ាគីស្ថានយ៉ាងឆាប់រហ័ស និងជាលទ្ធផលមានការតវ៉ាជាសាធារណៈមួយ។ មនុស្សរាប់រយនាក់រួមទាំងសាច់ញាតិរបស់គ្រួសារដែលត្រូវគេសម្លាប់នាំគ្នាដើរតាមផ្លូវ Sahiwal ដើម្បីប្រឆាំង នឹង CTD។
ហ្វូងមនុស្សរារាំងផ្លូវធំ ប៉ុន្តែប៉ុន្មានម៉ោងក្រោយ មកពួកគេយល់ព្រមចាកចេញ ក្រោយពីប៉ូលិសនិយាយជាមួយក្រុមអ្នកតវ៉ា។ មនុស្សជាច្រើនបង្ហោះលើប្រព័ន្ធផ្សព្វផ្សាយសង្គមដើម្បីបង្ហាញពីកំហឹងរបស់ពួកគេ និងទាមទាររកយុត្តិធម៌សម្រាប់ជនរងគ្រោះ។ នាយករដ្ឋមន្ត្រីលោក Imran Khan សរសេរនៅក្នុង Tweet ថា គាត់មានការភ្ញាក់ផ្អើលយ៉ាងខ្លាំង ចំពោះឧបទ្ទវហេតុនេះហើយសន្យាថា នឹងមានសកម្មភាពយ៉ាងឆាប់រហ័ស និងកំណែទម្រង់ ប៉ូលិសក្នុងខេត្តនេះ។ គេរាយការណ៍ថា មន្ត្រីប៉ូលិស CTD មានចំនួន១២ នាក់ ត្រូវគេចាប់ខ្លួនខណៈដែលមានការស៊ើបអង្កេតទៅលើឧបទ្ទវហេតុធ្វើឡើងនៅថ្ងៃអាទិត្យ។
![](https://i0.wp.com/www.cdn.nctc.gov.kh/2019/01/5c45c03ddda4c8a32d8b45ee.jpg?resize=696%2C391&ssl=1)