ប្រភពព័ត៌មានពី IraqiNews ចេញផ្សាយថ្ងៃទី២៩ ខែមករា ឆ្នាំ២០១៩
អាជ្ញាធរអ៊ីរ៉ាក់ប្រកាសកាលពីថ្ងៃអង្គារនេះថាសមាជិកក្រុមអ៊ីស្លាមចំនួន៩នាក់ត្រូវចាប់ខ្លួនក្នុងអំឡុងប្រតិបត្តិការនៅក្នុងទីក្រុងSulaymaniyah ស្ថិតនៅក្នុងតំបន់ពាក់កណ្តាលស្វ័យតឃឺដ។ ដោយផ្អែកលើរបាយការណ៍ស៊ើបការណ៍សម្ងាត់ដ៏ជាក់លាក់របស់កងកម្លាំងពិសេសប្រឆាំងភេរវកម្មឃាត់ខ្លួនសមាជិកIS ៩នាក់ជាប់ពាក់ព័ន្ធក្នុងការសម្លាប់ជនស៊ីវិលបង្ខំឲ្យប្រជាពលរដ្ឋចាកចេញពីផ្ទះ និងសកម្មភាពប្រយុទ្ធប្រឆាំងនឹងកងកម្លាំងសន្ដិសុខ។
ការចាប់ខ្លួននេះត្រូវធ្វើឡើងនៅក្នុងទីក្រុងSulaymaniyahរបស់ឃឺដ។ មជ្ឈមណ្ឌលនេះនិយាយថាការសម្របសម្រួលត្រូវបានធ្វើឡើងជាមួយស្ថាប័នពាក់ព័ន្ធដើម្បីផ្ទេរជនល្មើសទៅកាន់មជ្ឈមណ្ឌលឃុំឃាំងមួយស្ថិតនៅក្នុងខេត្តKirkuk ដើម្បីធ្វើការសាកសួរ។
គួររំលឹកថាក្រុមរដ្ឋអ៊ីស្លាមបានបង្ហាញខ្លួននៅលើឆាកអន្តរជាតិកាលពីឆ្នាំ២០១៤ នៅពេលនោះក្រុមនេះបានរឹបអូសយកដែនដីធំៗនៅក្នុងប្រទេសអ៊ីរ៉ាក់ និងស៊ីរីដោយប្រកាសបង្កើតរដ្ឋអ៊ីស្លាមរបស់ពួកគេចេញពីរដ្ឋធានីMosul។
ក្រោយមកទៀតក្រុមនេះបានក្លាយជាក្រុមល្បីល្បាញខាងអំពើឃោរឃៅ រួមទាំងការសម្លាប់រង្គាល ការចាប់ពង្រត់ និងការកាត់ក្បាលមនុស្សដែលជាហេតុជំរុញឲ្យសហរដ្ឋអាមេរិកបានដឹកនាំកងកម្លាំងចម្រុះអន្តរជាតិដើម្បីកម្ទេចក្រុមនេះចោល។
កាលពីខែធ្នូកន្លងមកនាយករដ្ឋមន្ត្រីអ៊ីរ៉ាក់លោក Haidar al-Abadi បានប្រកាសថាបានគ្រប់គ្រងលើ ដែនដីទាំងអស់ឡើងវិញ ហើយក៏បានប្រកាសបញ្ចប់សង្រ្គាមប្រឆាំងនឹងសមាជិកIS។ តែទោះជាយ៉ាងណាក្តីរបាយការណ៍សន្តិសុខបានព្រមានថាក្រុមសកម្មប្រយុទ្ធនៅតែបង្កការគំរាមកំហែងប្រឆាំងនឹងស្ថេរភាពនៅក្នុងប្រទេសនេះ។
![](https://i0.wp.com/www.cdn.nctc.gov.kh/2019/01/ា-82.jpg?resize=696%2C388&ssl=1)