ប្រភពព័ត៌មានពី RT ចេញផ្សាយថ្ងៃទី២៣ ខែឧសភា ឆ្នាំ២០១៩
យោងតាមប្រភពព័ត៌មានពីទូរទស្សន៍ A Haber របស់ប្រទេសទួរគីផ្សាយថា ក្រុងអង់ការ៉ា ច្រានចោលចំពោះសេចក្តីរាយការណ៍របស់បណ្តាញព័ត៌មានថា សហរដ្ឋអាមេរិកកំណត់ថ្ងៃជាផ្លូវការឱ្យប្រទេសទួរគីដកខ្លួនចេញពីកិច្ចព្រមព្រៀង S-៤០០ ជាមួយរុស្ស៊ីនៅចុងសប្តាហ៍ទីមួយក្នុងខែមិថុនាខាងមុខ។
អនុរដ្ឋមន្ត្រីការបរទេសទួរគីលោក Yavuz Selim Kiran មានប្រសាសន៍ថា “ក្នុងខែមិនាសហរដ្ឋអាមេរិកកែសំណើពីមុនរបស់ខ្លួនលើការផ្គត់ផ្គង់ប្រព័ន្ធការពារម៉ីស៊ីល Patriot ។ តាមពិតទៅយើងជឿថា របាយការណ៍សង្គមព័ត៌មានមានទាក់ទងទៅនឹងសំណើនោះ។ លោក Kiran មានប្រសាសន៍ក្នុងទីក្រុងវ៉ាស៊ីនតោននៅថ្ងៃពុធថា ក្រុងអង់ការ៉ាប្រឆាំងនឹងទណ្ឌកម្មរបស់សហរដ្ឋអាមេរិកដែលជាការប្រឆាំងនឹងច្បាប់ដាក់ទណ្ឌកម្ម។
លោកសង្កត់ធ្ងន់ថា កិច្ចព្រមព្រៀងជាមួយក្រុងម៉ូស្គូដើម្បីទិញប្រព័ន្ធការពារអាកាស S-៤០០ ចំនួនបួនគ្រឿងត្រូវគេចុះហត្ថលេខាមុនពេលមានការអនុម័តច្បាប់នេះ។ ក្នុងនាមជារដ្ឋមួយរបស់អង្គការណាតូ ប្រទេសទួរគីកំពុងប្រឈមនឹងសម្ពាធកាន់តែខ្លាំងឡើងពីសហរដ្ឋអាមេរិក និងសម្ព័ន្ធមិត្តរបស់ខ្លួនលើកិច្ចព្រមព្រៀងទិញប្រព័ន្ធការពារអាកាស S-៤០០។
នៅថ្ងៃពុធប្រទេសអាឡឺម៉ង់ជំរុញឱ្យប្រទេសទួរគីលុបចោលកិច្ចព្រមព្រៀងនេះដែលវាអាចបន្ធូរបន្ថយទណ្ឌកម្មរបស់សហរដ្ឋអាមេរិកដែលប្រឆាំងនឹងផលប្រយោជន៍ទួរគី និងជំរុញឱ្យប្រទេសទួរគីធ្វើការជ្រើសរើសយកប្រព័ន្ធ Patriot ដែលផលិតនៅអាមេរិក។ នៅថ្ងៃអង្គារមានប្រព័ន្ធផ្សព្វផ្សាយជាច្រើនរបស់អាមេរិកស្រង់សម្តីប្រភពរបស់រដ្ឋាភិបាលមានសេចក្តីថា ” ប្រទេសទួរគីកំពុងប្រឈមមុខនឹងការគំរាមកំហែងមួយដើម្បីបញ្ឈប់ប្រតិបត្តិការទិញអាវុធជាមួយប្រទេសរុស្ស៊ីក្នុងរយៈពេលពីរសប្តាហ៍។ សេតវិមានជំទាស់នឹងកិច្ចព្រមព្រៀងនេះដោយលើកឡើងអំពីការព្រួយបារម្ភផ្នែកសន្តិសុខ និងលើកហេតុផលថា ប្រព័ន្ធការពារអាកាស S-៤០០ គឺមិនអាចប្រើត្រូវគ្នាជាមួយនឹងប្រព័ន្ធណាមួយរបស់អង្គការណាតូឡើយ។”