ប្រភពព័ត៌មានពី TASS ចេញផ្សាយថ្ងៃទី១៦ ខែមិថុនា ឆ្នាំ២០១៩
កាសែតអាលម៉ាស្តា(Al-Masdar) រាយការណ៍ថា កងទ័ពស៊ីរីទទួលបានការគាំទ្រពីកងកម្លាំងការពារជាតិ ដណ្តើមបានតំបន់យុទ្ធសាស្ត្រថែល មាលេស (Tell Maleh) នៅភាគពាយព្យនៃខេត្តហាម៉ា។ ក្នុងអំឡុងពេលប្រតិបត្តិការវាយលុក កងកម្លាំងកម្ចាត់ពួកភេរវជនពីក្រុមចាបាតអាល់នុស្រា(Jabhat Al-Nusra ក្រុមភេរវកម្មខុសច្បាប់នៅក្នុងប្រទេសរុស្ស៊ី) និងដណ្តើមបានតំបន់នោះមកគ្រប់គ្រង។
កងទ័ពស៊ីរីថែមទាំងរំដោះបានតំបន់តាំងលំនៅតំបន់អាល់ ចេប៊ីន Al Jebin និងគ្របគ្រងលើផ្លូវហាយវ៉េរវាងទីក្រុង Mharde និង Sukeylabiya។ នៅថ្ងៃទី៧ ខែមិថុនា កងទ័ព និងកងជីវពលរំដោះបានតំបន់យុទ្ធសាស្ត្រថែលមាលេស (Tell Maleh) ពីពួកភេរវជន។ ទោះជាយ៉ាងណាប៉ុន្មានថ្ងៃក្រោយមកកងទ័ពស៊ីរ៉ីបន្ថយកម្លាំងវាយប្រហារក្នុងតំបន់នោះដើម្បីចៀសវាងការស្លាប់ និងរបួសកាន់តែច្រើន។
កងទ័ពកម្លាំងខ្លារបស់ស៊ីរីដឹកនាំដោយឧត្តមសេនីយ៍ Suheil al-Hassan ឥឡូវនេះកំពុងប្រយុទ្ធដើម្បីដណ្តើមយកតំបន់តាល អាលសាខ (Tal al-Sakhr) នៅភាគខាងជើងតំបន់កាហ្វ ណាបុដា (Kafr Nabuda) ។ ការគ្រប់គ្រងលើតំបន់នោះនឹងអនុញ្ញាតឱ្យកងកម្លាំងរបស់រដ្ឋាភិបាលទទួលបានកន្លែងរឹងមាំពីក្រុមភេរវករដ៏ធំមួយនៅក្នុងតំបន់ស្ហាយខុន (Shaykhun) នៅភាគខាងត្បូងខេត្តអ៊ីដលីប និងនៅចន្លោះរដ្ឋធានីហាម៉ា និងអាឡេប៉ូ។
ចាប់តាំងពីដើមខែឧសភាមក កងកម្លាំងស៊ីរីរំដោះបានទីក្រុង និងភូមិមានចំនួនច្រើនជាង ២០ដើម្បីពង្រីកការគ្រប់គ្រងរបស់ខ្លួននៅភាគពាយព្យរបស់ប្រទេស។ ប្រតិបត្តិការនេះធ្វើឡើងតាមបញ្ជារបស់សាធារណរដ្ឋ មានគោលបំណងធានាសន្តិសុខក្នុងតំបន់របស់ស៊ីវិលនៅភាគកណ្តាលខេត្តហាម៉ា ដែលធ្លាប់ទទួលរងការវាយប្រហារពីភេរវជន។