ប្រភពព័ត៌មានពី RT ចេញផ្សាយថ្ងៃទី១៧ ខែមិថុនា ឆ្នាំ២០១៩
ក្រុមអ្នកប្រយុទ្ធរុស្ស៊ីប្រញាប់ប្រញាល់ទ្វេរដងដើម្បីរារាំងយន្តហោះទម្លាក់គ្រាប់បែក B-៥២H អាមេរិក ដែលមានសកម្មភាពនៅលើព្រំដែនភាគខាងកើត និងខាងត្បូង។ ការជួបគ្នាយ៉ាងជិតស្និទ្ធរវាងយន្តហោះរុស្ស៊ី និងអាមេរិកកើតឡើងទាំងនៅខាងលើសមុទ្របាល់ទិក និងសមុទ្រខ្មៅ។
មន្រ្តីក្រសួងការពារជាតិរុស្ស៊ីនិយាយថា យន្តហោះទម្លាក់គ្រាប់បែកយុទ្ធសាស្ត្ររបស់អាមេរិកត្រូវរុស្ស៉ីស្ទាក់បានចំនួនពីរលើកនៅថ្ងៃចន្ទ ដោយពុំផ្តល់ចំនួនពិតប្រាកដនៃយន្តហោះដែលជាប់ពាក់ព័ន្ធនឹងការជួបគ្នានោះទេ។ កងទ័ពនិយាយថា “នាវិកយន្តហោះចម្បាំង Su-២៧ របស់រុស្ស៊ីស្ទាក់យន្តហោះទម្លាក់គ្រាប់បែកយុទ្ធសាស្ត្រ B-៥២H របស់កងទ័ពអាកាសអាមេរិកដែលហោះទៅដល់ព្រំដែនរដ្ឋរុស្ស៊ីនៅសមុទ្រខ្មៅ និងសមុទ្របាល់ទិក”។
យន្តហោះអាមេរិកមិនបានបំពានលើព្រំដែនប្រទេសរុស្ស៉ីទេ ហើយត្រូវគេនាំចេញដោយសុវត្ថិភាព។ យោធាបន្ថែមទៀតថា ការហោះហើររបស់រុស្ស៊ីទាំងអស់អនុវត្តស្របតាមច្បាប់អន្ដរជាតិ។ យន្តហោះយុទ្ធសាស្ត្រអាមេរិក ក៏ដូចជាយន្តហោះចារកម្មមានសកម្មភាពខ្លាំងនៅជិតតំបន់ព្រំដែនរុស្ស៊ីនៅរយៈពេលប៉ុន្មានឆ្នាំកន្លងទៅ។
ការជួបគ្នាយ៉ាងជិតស្និទ្ធរវាងយន្តហោះរបស់ប្រទេសទាំងពីរគឺកើតឡើងជាញឹកញាប់ ហើយយន្តហោះអាមេរិកជាច្រើនត្រូវយន្តហោះរុស្ស៊ីនាំចេញជាទៀងទាត់។ ខណៈពេលដែលសកម្មភាពបែបនោះជាសំណាងល្អមិនបណ្ដាលឱ្យមានឧប្បត្តិហេតុដ៏ធំមួយនោះទីក្រុងម៉ូស្គូ និងវ៉ាស៊ីនតោន មានការចោទប្រកាន់គ្នាម្តងហើយម្តងទៀតចំពោះសកម្មភាពអមិត្ត ខណៈពេលដែលប្រទេសរុស្ស៊ីអះអាងថា ការហោះហើរបែបនោះស្ថិតនៅជិតព្រំប្រទល់របស់ខ្លួន ហើយកត្តានោះបង្កើតឱ្យមានភាពតានតឹងដែលមិនចាំបាច់។យោធាអាមេរិកបង្ហាញការសោកស្ដាយម្តងហើយម្តងទៀតចំពោះការស្ទាក់យន្តហោះរបស់ខ្លួន ដោយចោទប្រកាន់លើអាកាសយានិករុស្ស៊ីថា ពុំមានវិជ្ជាជីវៈ។
