ប្រភពព័ត៌មានពី RT ផ្សាយថ្ងៃទី៣០ ខែកញ្ញា ឆ្នាំ២០១៩
មូលដ្ឋានទ័ពអាមេរិក និងក្បួនយោធាអ៊ីតាលីស្ថិតក្រោមការវាយប្រហារនៅក្នុងប្រទេសសូម៉ាលីកន្លែងដែលកងទ័ពបរទេសកំពុងឈរជើងគាំទ្ររដ្ឋាភិបាល។ ក្នុងករណីវាយប្រហារទាំងពីរក្រុមអ៊ីស្លាមមានទំនាក់ទំនងជាមួយអាល់កៃដាឈ្មោះថា អាល់សាបាបអះអាងទទួលខុសត្រូវ។ មូលដ្ឋានទ័ពពិសេសរបស់សហរដ្ឋអាមេរិក Baledogle ដែលមានចម្ងាយប្រមាណ១០០គីឡូម៉ែត្រពីរដ្ឋធានី Mogadishu ជាកន្លែងផ្តល់ការហ្វឹកហាត់ដល់ក្រុមកម្មង់ដូក្នុងស្រុករងការវាយប្រហារនៅថ្ងៃច័ន្ទ។ ក្រុមសកម្មប្រយុទ្ធប្រើគ្រាប់បែកក្នុងរថយន្តចំនួន២គ្រឿងដើម្បីបំផ្ទុះលើបរិវេននោះ ក្រោយមកវាយប្រហារទៅលើរថយន្តនោះដោយប្រើអាវុធធុនតូច។ ក្រុមអាល់សាបាបអះអាងថា ពួកគេអាចចូលទៅក្នុងបរិវេណមូលដ្ឋានយោធា និងវាយលុកលើអគារយោធានោះរួមទាំងបាញ់កាំភ្លើងយ៉ាងខ្លាំង។ យោងតាមប្រភពព័ត៌មានពីប៉ូលិសបញ្ជាក់ថា គ្រាប់បែកក្នុងរថយន្តទាំងពីរមិនទាន់ទៅដល់មូលដ្ឋាននោះទេ ហើយវាផ្ទុះមុន។ យោធាអាមេរិកពុំផ្តល់ព័ត៌មានលម្អិតអំពីការវាយប្រហារនោះទេដោយនិយាយថាពួកគេកំពុងវាយតម្លៃស្ថានការណ៍ និងធ្វើការដើម្បីបញ្ជាក់ពីព័ត៌មានលម្អិតនៃឧប្បត្តិហេតុនេះ។ ក្រោយមកនៅថ្ងៃដដែល មេបញ្ជាការអាហ្រ្វិកអាមេរិកបញ្ជាក់ថា ពុំមានទាហានអាមេរិក ឬទាហានជាដៃគូររងរបួសក្នុងពេលវាយប្រហារនៅក្នុងមូលដ្ឋាននោះទេ។ ជាការឆ្លើយតបនឹងការវាយប្រហាររបស់ក្រុមឧទ្ទាមអាល់សាបាប កងកម្លាំងសហរដ្ឋអាមេរិកធ្វើការវាយប្រហារតាមអាកាសចំនួន ២លើកទៅលើពួកសកម្មប្រយុទ្ធដោយសម្លាប់សមាជិករបស់ក្រុមនោះចំនួន១០នាក់ និងបំផ្លាញយានយន្តមួយគ្រឿង។ នៅក្នុងឧប្បត្តិហេតុដាច់ដោយឡែកមួយទៀត ក្បួនយោធាអ៊ីតាលីត្រូវគេកំណត់គោលដៅដោយប្រើគ្រាប់បែកនៅតាមដងផ្លូវមួយនៅក្រុង Mogadishu។ យោធាអ៊ីតាលីមានវត្តមាននៅក្នុងប្រទេសនោះ ជាផ្នែកមួយនៃបេសកកម្មរបស់សហភាពអឺរ៉ុបក្នុងការបណ្តុះបណ្តាលកម្លាំងរបស់រដ្ឋាភិបាលសូម៉ាលីមានការគាំទ្រពីអង្គការសហប្រជាជាតិ។ រូបថតចេញពីកន្លែងកើតហេតុបង្ហាញថា យ៉ាងហោចណាស់មានរថពាសដែកអ៊ីតាលីមួយគ្រឿងរងការខូចខាតក្នុងការផ្ទុះ ហើយអគារនៅក្បែរទីនោះក៏រងការខូចខាតយ៉ាងធ្ងន់ធ្ងរដែរ។ ក្រសួងការពារជាតិនិយាយថា ទោះជាយ៉ាងណាក៏ដោយពុំមានរបាយការណ៍ណាមួយលើកឡើងពីការរងរបួសរបស់ទាហានអ៊ីតាលីនោះទេ។ ការវាយប្រហារភ្លោះនោះកើតឡើងបន្ទាប់ពីមានឧប្បត្តិហេតុធំៗ ផ្សេងទៀតពាក់ព័ន្ធនឹងក្រុមអាល់សាបាប ដោយពួកគេធ្លាប់ និងកំពុងធ្វើកុបកម្មនៅក្នុងប្រទេសសូម៉ាលីចាប់តាំងពីពាក់កណ្តាលទសវត្សឆ្នាំ២០០០។ នៅថ្ងៃទី២២ ខែកញ្ញា ក្រុមនោះធ្វើការវាយប្រហារ និងលួចយកមូលដ្ឋានយោធាមួយនៅតំបន់ El Salini ដែលមានចម្ងាយប្រមាណ៦០គីឡូម៉ែត្រភាគនិរតីនៃទីក្រុង Mogadishu។ ពួកសកម្មប្រយុទ្ធប្រើអ្នកបំផ្ទុះគ្រាប់បែកអត្តឃាតដើម្បីបំពានលើបរិវេណនោះ ហើយបន្ទាប់មកសម្រុកចូលដោយថ្មើរជើង។ នៅរយៈពេលមួយសប្តាហ៍មុនក្រុមអាល់សាបាបអះអាងថា ពួកគេធ្លាប់ធ្វើការវាយប្រហារលើកងរក្សាសន្តិភាពប៊ូរុនឌីដោយសម្លាប់ទាហានយ៉ាងហោចណាស់ចំនួន១៤នាក់។ ទោះយ៉ាងណាសហភាពអាហ្រ្វិក (អ្នកគ្រប់គ្រងបេសកកម្មថែរក្សាសន្តិភាព) ទទួលស្គាល់ការស្លាប់របស់ទាហានតែចំនួន៣នាក់ប៉ុណ្ណោះ៕
