ប្រភពព័ត៌មានពី RT ផ្សាយថ្ងៃទី០៧ ខែតុលា ឆ្នាំ២០១៩
អ្នកនាំពាក្យរដ្ឋាភិបាលអ៊ីរ៉ង់លោក អាលី រ៉ាប៊ី មានប្រសាសន៍នៅថ្ងៃចន្ទថា ការចាប់ខ្លួនអ្នកយកព័ត៌មានរុស្ស៊ី លោកស្រី យូលៀ យូហ្សីគ គឺមិនមានទាក់ទងនឹងការចោទប្រកាន់បទចារកម្មនោះទេ។ លោកមានប្រសាសន៍ថា “បញ្ហានេះមិនទាក់ទងនឹងអំពើរចារកម្មទេ។តាមខ្ញុំដឹងនាងត្រូវគេឃុំឃាំងដោយសារបញ្ហាទិដ្ឋាការ។” គេរាយការណ៍ថា លោកស្រី យូហ្សីក ដែលធ្លាប់ធ្វើការជាអ្នកកាសែតនៅប្រទេសអ៊ីរ៉ង់ត្រូវកងឆ្មាំបដិវត្តអ៊ីរ៉ង់ចាប់ខ្លួន។ ស្ថានទូតរុស្ស៊ីប្រចាំនៅប្រទេសអ៊ីរ៉ង់មានប្រសាសន៍ថា លោកស្រី យូហ្សីក ត្រូវគេចាប់ខ្លួននៅសណ្ឋាគារមួយក្នុងទីក្រុងតេអេរ៉ង់នៅថ្ងៃទី២ ខែតុលា។ ប្រភពបន្ថែមថា លោកស្រីពុំបានលើកឡើងពីសកកម្មការទូត ដែលមានជាប់ពាក់ព័ន្ធជាមួយលិខិតឆ្លងដែនដែលគេរឹបអូសយកនោះទេ។ អ្នកនាំពាក្យប្រធានាធិបតីរុស្ស៊ី លោក ម៊ីតទ្រី ផេសកូវ ប្រាប់ក្រុមអ្នកកាសែតនៅថ្ងៃច័ន្ទថា វិមានក្រឹមឡាំងរំពឹងថាលោកស្រី យូហ្សីក នឹងត្រូវគេដោះលែងក្នុងពេលឆាប់ៗនេះ។ លោកបន្ថែមថា “ យើងយល់ថាការឃុំខ្លួនអ្នកសារព័ត៌មានរុស្ស៊ីជារឿងដែលមិនអាចទទួលយកបាន ហើយយើងសង្ឃឹមថាលោកស្រីនឹងត្រូវគេដោះលែងក្នុងពេលឆាប់ៗនេះ ខណៈដែលភាគីប្រទេសរុស្ស៊ីនឹងធ្វើការពន្យល់ដែលមានភាពចាំបាច់ទាំងអស់”៕
