ប្រភពព័ត៌មានពី CAN ចុះផ្សាយថ្ងៃទី០៦ ខែតុលា ឆ្នាំ២០១៩
មួយថ្ងៃបន្ទាប់ពីការចរចានៅក្នុងប្រទេសស៊ុយអែតបានបែកបាក់ ប្រទេសកូរ៉េខាងជើងនិយាយកាលពីថ្ងៃអាទិត្យ (ថ្ងៃទី០៦ ខែតុលា) ថាខ្លួនមិនចង់បន្តកិច្ចចរចានុយក្លេអ៊ែរទេដរាបណាសហរដ្ឋអាមេរិកចាត់វិធានការបញ្ចប់ភាពប្រឆាំងរបស់ខ្លួន។ កិច្ចពិភាក្សានៅក្នុងប្រទេសស៊ុយអែតបានជាប់គាំងជាច្រើនខែបន្ទាប់ពីកិច្ចប្រជុំនៅខែកុម្ភៈរវាងមេដឹកនាំកូរ៉េខាងជើងលោក គីម ជុងអ៊ុន និងប្រធានាធិបតី ដូណាល់ ត្រាំ ក្រោយមកវាក៏មានការសាកល្បងមីស៊ីលផ្លោងរបស់ក្រុងព្យុងយ៉ាងកាលពីថ្ងៃពុធនេះផងដែរ។ កូរ៉េខាងជើងដើរចេញពីកិច្ចចរចាស៊ុយអែតដោយនិយាយថាខ្លួនខកចិត្តចំពោះកង្វះខាតនៃដំណោះស្រាយ “ថ្មី និងភាពច្នៃប្រឌិត” ដែលផ្តល់ដោយទីក្រុងវ៉ាស៊ីនតោន។ ប៉ុន្តែអ្នកនាំពាក្យម្នាក់នៅឯក្រសួងការបរទេសកូរ៉េខាងជើងនិយាយថា ការអះអាងរបស់ទីក្រុងវ៉ាស៊ីនតោនអំពីការប្រជុំមួយផ្សេងទៀតគឺមិនត្រូវបានកើតឡើងនោះទេ។ លោកនិយាយថា “ យើងមិនមានចេតនាដើម្បីធ្វើកិច្ចចរចាដែលមានសភាពធ្ងន់ធ្ងរដូចអ្វីដែលបានកើតឡើងនៅពេលនេះទេ មុនពេលដែលសហរដ្ឋអាមេរិកចាត់វិធានការយ៉ាងសំខាន់ដើម្បីធ្វើឱ្យមានការដកចេញទាំងស្រុងនូវគោលនយោបាយប្រឆាំងនឹងប្រទេសកូរ៉េខាងជើងនោះ”។ នៅក្នុងសេចក្តីថ្លែងការណ៍មួយដែលធ្វើឡើងដោយទីភ្នាក់ងារសារព័ត៌មានកណ្តាលកូរ៉េខាងជើងអ្នកនាំពាក្យបានព្រមានថា “ការទាក់ទង” របស់ពួកគេអាចនឹងបញ្ចប់ភ្លាមៗប្រសិនបើសហរដ្ឋអាមេរិកប្រកាន់ខ្ជាប់នូវរបៀបចាស់របស់ខ្លួននោះ។ យ៉ាងណាមិញ លោក ត្រាំ និយាយថាលោកមើលឃើញថា មិនមានបញ្ហាជាមួយនឹងការខាកល្បងមីស៊ីលរយៈចម្ងាយខ្លីដែលត្រូវបានធ្វើឡើងពីមុនដោយប្រទេសកូរ៉េខាងជើងនោះទេ ខណៈដែលទទូចថាទំនាក់ទំនងផ្ទាល់ខ្លួនរបស់គាត់ជាមួយមេដឹកនាំកូរ៉េខាងជើងគឺនៅតែល្អ។ គួរបញ្ជាក់ផងដែរថា កូរ៉េខាងជើងត្រូវបានហាមឃាត់មិនឱ្យបាញ់មីស៊ីលផ្លោងនោះទេដែលវាគឺជាដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិ៕
