ស្នងការសិទ្ធិមនុស្សនៃក្រុមប្រឹក្សាអឺរ៉ុបព្រមានកាលពីថ្ងៃព្រហស្បតិ៍ថា ស្ថានភាពសម្រាប់ជនចំណាកស្រុករួមទាំងអ្នកស្វែងរកសិទ្ធិជ្រកកោននៅក្នុងជំរុំនៅលើកោះក្រិកគឺ “ផ្ទុះកាន់តែច្រើន” និង “អាចបង្ករជាគ្រោះមហន្តរាយ” បានផងដែរ។
លោកស្រី Dunja Mijatovic ប្រាប់ក្រុមអ្នកយកព័ត៌មាននៅចុងបញ្ចប់នៃដំណើរទស្សនកិច្ចរយៈពេល ៥ ថ្ងៃថាស្ថានភាពកិច្ចការនៅទីនោះកាន់តែអាក្រក់ទៅៗ ក្នុងរយៈពេល ១២ ខែនេះ។ ទីភ្នាក់ងារនោះដកស្រង់សម្តីមន្ត្រីរូបនោះថា“ វិធានការជាបន្ទាន់គឺត្រូវការជាចាំបាច់ដើម្បីដោះស្រាយនូវស្ថានភាពអស់សង្ឃឹមដែលមនុស្សរាប់ពាន់នាក់កំពុងរស់នៅទីនេះ” ។
ប្រទេសក្រិកកំពុងតស៊ូដើម្បីទទួលជនភៀសខ្លួន និងជនចំណាកស្រុកជាង ៧០០០០ នាក់នៅលើទឹកដីរបស់ខ្លួន។ ទោះបីជាមានការផ្លាស់ប្តូរទីលំនៅជាទៀងទាត់ទៅកាន់ដីគោកក៏ដោយ ក៏មានប្រជាជនជាង ៣៤.០០០ នាក់រស់នៅក្នុងជំរុំដែលចង្អៀតនៅលើកោះក្រិកនេះ។
សភាក្រិកគ្រោងនឹងអនុម័តច្បាប់ចំណាកស្រុកថ្មីដែលកំណត់ការផ្លាស់ប្តូរគោលនយោបាយហើយលោកស្រី Mijatovic និយាយថា សម្រាប់សេចក្តីព្រាងច្បាប់នេះលោកស្រីបានមើលឃើញអំពីការព្រួយបារម្ភពីទស្សនៈរបស់ក្រុមសិទ្ធិមនុស្ស៕
ប្រភព RT ចុះផ្សាយថ្ងៃទី ៣១ ខែតុលា ឆ្នាំ ២០១៩
