រដ្ឋាភិបាលបញ្ជាក់កាលពីថ្ងៃសៅរ៍ថា មនុស្ស ៥៤ នាក់ត្រូវសម្លាប់នៅក្នុងការវាយឆ្មក់របស់ក្រុមជីហាដទៅលើប៉ុស្តិ៍យោធាមួយនៅភាគខាងជើងប្រទេសម៉ាលីរួមទាំងជនស៊ីវិលម្នាក់ផងដែរ។ អ្នកនាំពាក្យរដ្ឋាភិបាលនិយាយថាមនុស្ស ១០ នាក់រួចផុតពីការវាយប្រហារដែលបណ្តាលឱ្យខូចខាតសម្ភារៈយ៉ាងច្រើនផងដែរ។
ប្រទេសនេះទទួលរងការវាយប្រហារសកម្មប្រយុទ្ធអ៊ីស្លាមយ៉ាងធ្ងន់ធ្ងរនៅក្នុងប៉ុន្មានខែថ្មីៗនេះ។ ការវាយប្រហារកាលពីថ្ងៃសុក្រទៅលើប៉ុស្តិ៍កងទ័ពនៅ Indelimane កើតឡើងតែប៉ុន្មានសប្តាហ៍ប៉ុណ្ណោះបន្ទាប់ពីការវាយប្រហារយ៉ាងធ្ងន់ធ្ងរទៅលើមូលដ្ឋានកងទ័ពពីរនៅភាគកណ្តាលប្រទេសម៉ាលីដោយសម្លាប់ទាហាន ៣៨ នាក់។
ទាហានប្រហែល ៦០ នាក់ត្រូវប្រកាសថាបាត់ខ្លួន ឬត្រូវចាប់ខ្លួនបន្ទាប់ពីការវាយប្រហារនៅខែកញ្ញានេះ។ កងទ័ពម៉ាលីនិយាយថា ខ្លួនបានជួយសង្គ្រោះបុរសប្រហែល ៣៦ នាក់នៃការវាយឆ្មក់ប្រឆាំងជំរុំសកម្មប្រយុទ្ធមួយនៅពាក់កណ្តាលខែតុលាហើយសម្លាប់ក្រុមសកម្មប្រយុទ្ធប្រហែល ៥០ នាក់នៅក្នុងប្រតិបត្តិការនេះ៕
ប្រភព RT ចុះផ្សាយថ្ងៃទី ២ ខែវិច្ឆិកា ឆ្នាំ ២០១៩
