ជាមួយនឹងការធ្វើយុទ្ធនាការពេញទំហឹងសម្រាប់ការបោះឆ្នោតនៅថ្ងៃទី ១២ ខែធ្នូនេះ ប្រទេសអង់គ្លេសជូនដំណឹងដល់ដៃគូសហភាពអឺរ៉ុបរបស់ខ្លួនថា ខ្លួននឹងមិនដាក់ឈ្មោះស្នងការថ្មីទៅក្នុងដៃប្រតិបត្តិរបស់សហភាពអឺរ៉ុបឡើយ ទោះបីមានកាតព្វកិច្ចត្រូវធ្វើក៏ដោយ។
ទីភ្នាក់ងារព័ត៌មាន AP រាយការណ៍ថាប្រេសិតអង់គ្លេសប្រចាំនៅទីក្រុងប្រ៊ុចសែលលោក Tim Barrow ផ្ញើលិខិតទៅទីស្នាក់ការកណ្តាលរបស់សហភាពអ៊ឺរ៉ុបដើម្បីជូនដំណឹងដល់ពួកគេអំពីការសម្រេចចិត្តរបស់ទីក្រុងឡុង។ ការិយាល័យរបស់លោក Barrow និយាយកាលពីថ្ងៃព្រហស្បតិ៍ថា“ យើងសរសេរទៅសហភាពអឺរ៉ុបដើម្បីបញ្ជាក់ថាគោលការណ៍ណែនាំមុនការបោះឆ្នោតថា ចក្រភពអង់គ្លេសមិនគួរធ្វើការតែងតាំងជាលក្ខណៈអន្តរជាតិអ្វីនោះទេក្នុងអំឡុងពេលនេះ” ។
ទីក្រុងឡុងអះអាងជាប្រចាំថា ខ្លួនចង់គោរពច្បាប់របស់សហភាពអ៊ឺរ៉ុប និងមិនរារាំងមុខងាររបស់ប្លុកនេះទេដរាបណាវានៅតែជាសមាជិកនោះ។ គណៈកម្មការនេះសរសេរលិខិតចំនួនពីរដងទៅកាន់នាយករដ្ឋមន្រ្តីអង់គ្លេសលោក Boris Johnson ដើម្បីទាមទារឱ្យមានអ្នកណាម្នាក់មកជំនួសក្នុងរឿងនេះ។ លោក Johnsonធ្លាប់បានប្តេជ្ញាថាមិនធ្វើដូច្នោះទេ។ ការសម្រេចចិត្តរបស់ចក្រភពអង់គ្លេសដែលមិនដាក់ឈ្មោះបេក្ខជនសម្រាប់គណៈកម្មការនេះអាចពន្យាពេលការបង្កើតក្រុមការងាររបស់លោក Ursula von der Leyen ដែលជាប្រធានគណៈកម្មការនេះផងដែរ៕
ប្រភព RT ចុះផ្សាយថ្ងៃទី ១៤ ខែវិច្ឆិកា ឆ្នាំ ២០១៩
