សេចក្តីប្រកាសព័ត៌មានដ៏មួយរបស់ប៉ូលិសប្រទេសឥណ្ឌាបង្ហាញថាពួកគេបានឃ្លាំមើលយ៉ាងដិតដល់នូវអ្វីដែលនាយករដ្ឋមន្រ្តីប៉ាគីស្ថាន Imran Khan កំពុងនិយាយអំពីតំបន់កាស្មៀរ និងមានបញ្ជីគណនីផ្សេងទៀតដែលពួកគេបានតាមដាន។
ប៉ូលិសនៅក្នុងរដ្ឋ Jammu និងរដ្ឋកាស្មៀរ (J&K) របស់ប្រទេសឥណ្ឌាបញ្ជូនសេចក្តីប្រកាសព័ត៌មានមួយដែលហាក់ដូចជាមានលក្ខណៈស្តង់ដារអំពីការចាប់ខ្លួនអ្នកជួញដូរគ្រឿងញៀន ៣ នាក់កាលពីថ្ងៃសុក្រនេះ។ ប៉ុន្តែអ៊ីមែលដែលទទួលបានដោយប្រព័ន្ធផ្សព្វផ្សាយក្នុងស្រុកមានឯកសារ Microsoft Word ភ្ជាប់មកជាមួយដែលមិនមានអ្វីទាក់ទងនឹងរឿងនេះឡើយ។
ឯកសារដែលមាន ៨ ទំព័រមានផ្ទុកនូវរូបភាពអេក្រង់ខ្លីៗនៃបង្ហោះនៅលើបណ្តាញសងង្គមអំពីស្ថានភាពនៅជ្រលងភ្នំកាស្មៀររួមទាំងឯកសារដែលមានការចោទប្រកាន់ពីការរំលោភសិទ្ធិមនុស្សផងដែរ។ ប្រព័ន្ធផ្សព្វផ្សាយប្រទេសឥណ្ឌារាយការណ៍ថាមានបញ្ជីគណនី Twitter ផងដែរដែលត្រូវបានត្រួតពិនិត្យដោយប៉ូលិស។
ទាំងនេះរួមបញ្ចូលទាំងគណនីរបស់អ្នកនយោបាយប៉ាគីស្ថាននាំមុខដូចជានាយករដ្ឋមន្រ្តី Imran Khan និងរដ្ឋមន្រ្តីក្រសួងការបរទេស Shah Mahmood Qureshi ក៏ដូចជាអ្នកកាសែតសកម្មជននិងអង្គភាពសារព័ត៌មានបរទេសដូចជា DW News ដែលមានមូលដ្ឋាននៅទីក្រុងប៊ែរឡាំង និងវិទ្យុប៉ាគីស្ថានដែលគ្រប់គ្រងដោយរដ្ឋផងដែរ។ដោយដឹងថាពួកគេបានធ្វើខុស ប៉ូលិសផ្ញើអ៊ីមែលមួយទៀតដោយនិយាយថាឯកសារនេះត្រូវបានភ្ជាប់ដោយចៃដន្យហើយស្នើសុំអោយប្រព័ន្ធផ្សព្វផ្សាយ“ កុំអើពើនឹងឯកសារភ្ជាប់នេះ” ។
ប្រភពពីប៉ូលិសប្រាប់ ThePrint ថាការស្តីបន្ទោសដំបូងត្រូវធ្វើឡើងដោយមន្រ្តីថ្នាក់ទាបខណៈដែលប្រភពមួយទៀតសារភាពប្រាប់ News 18 ថាប៉ូលិសត្រួតពិនិត្យតាម Twitter ជាប្រចាំនិងធ្វើការបង្ហោះថា“ ការរិះគន់ពីរដ្ឋត្រូវបានប្រមូលទុក” ។
ប្រទេសឥណ្ឌាបោះបង់ចោលស្វ័យភាពដែលមានអាយុរាប់ទសវត្សរ៍របស់កាស្មៀនៅក្នុងខែសីហាដោយលើកហេតុផលថា វានឹងជួយក្នុងការប្រយុទ្ធប្រឆាំងនឹងអំពើភេរវកម្ម និងជំរុញសេដ្ឋកិច្ចក្នុងតំបន់។ លោកនាយករដ្ឋមន្រ្តី Narendra Modi និយាយថាការផ្លាស់ប្តូរនេះនឹងនាំមកនូវ “យុគសម័យថ្មីនៃស្ថេរភាពនយោបាយ” ដែលប្រជាជនទាំងអស់នឹងទទួលបានអត្ថប្រយោជន៍។ ទីក្រុងញូវដេលីក៏ដាក់បំរាមដូចជាបំរាមគោចរនៅផ្នែកខ្លះនៃកាស្មៀរដោយនិយាយថា ពួកគេចាំបាច់ត្រូវរក្សាសណ្តាប់ធ្នាប់នៅទីនេះ៕
ប្រភព RT ចុះផ្សាយថ្ងៃទី ២៤ ខែវិច្ឆិកា ឆ្នាំ ២០១៩
