រដ្ឋមន្រ្តីក្រសួងការពារជាតិបារាំងនិយាយថាបេសកកម្មនាវាចរដឹកនាំដោយអឺរ៉ុបដើម្បីឃ្លាំមើលដែនទឹកឈូងសមុទ្រនឹងត្រូវឈរជើងនៅមូលដ្ឋានកងទ័ពជើងទឹកបារាំងនៅអាប៊ូដាប៊ី (Abu Dhabi)។ ភាពតានតឹងនៅក្នុងឈូងសមុទ្រកើនឡើងចាប់តាំងពីខែឧសភាបន្ទាប់ពីការវាយប្រហារជាបន្តបន្ទាប់ទៅលើនាវាដឹកប្រេងដែលសហរដ្ឋអាមេរិកនិងសម្ព័ន្ធមិត្តស្តីបន្ទោសទៅលើទីក្រុងតេអេរ៉ង់។ អ៊ីរ៉ង់បដិសេធការចោទប្រកាន់នេះ។
រដ្ឋមន្រ្តីក្រសួងការពារជាតិបារាំងលោកស្រី Florence Parly ប្រាប់ AFP កាលពីថ្ងៃអាទិត្យថា“ យើងព្រមព្រៀងជាផ្លូវការថាមជ្ឈមណ្ឌលបញ្ជាការនៃគំនិតផ្តួចផ្តើមឃ្លាំមើលដែនសមុទ្រអឺរ៉ុបនឹងស្ថិតនៅលើទឹកដីអារ៉ាប់រួម”។លោកស្រីនិយាយនៅក្នុងដំណើរទស្សនកិច្ចទៅកាន់មូលដ្ឋាននោះថាវានឹងត្រូវដំណើរការដោយបុគ្គលិកប្រហែល ១០ ទៅ ១៥ នាក់ដែលត្រូវបានដាក់ពង្រាយនៅមូលដ្ឋានកងទ័ពជើងទឹកបារាំងនៅអាប៊ូដាប៊ីដែលនឹងចូលរួមចំណែកក្នុងការធ្វើនាវាចរណ៍តាមសមុទ្រក្នុងឈូងសមុទ្រឱ្យមានសុវត្ថិភាពតាមដែលអាចធ្វើទៅបាន។ លោកស្រី Parly មិនកំណត់អត្តសញ្ញាណប្រទេសដែលនឹងចូលរួមបេសកកម្មនេះទេដោយនិយាយថាអ្នកខ្លះកំពុងរង់ចាំសភារៀងៗខ្លួនដើម្បីផ្តល់សច្ចាប័នដល់ការចូលរួមរបស់ពួកគេនៅក្នុងគំនិតផ្តួចផ្តើមនេះ៕
ប្រភព RT ចុះផ្សាយថ្ងៃទី ២៥ ខែវិច្ឆិកា ឆ្នាំ ២០១៩
