អូទ្រីសអនុញ្ញាតឱ្យបើកសារមន្ទីរ កន្លែងវប្បធម៌មួយចំនួនឡើងវិញនៅពាក់កណ្តាលខែឧសភានេះ

អនុប្រធានអធិការបតីលោក Werner Kogler និយាយកាលពីថ្ងៃសុក្រថាសារមន្ទីរអូទ្រីស និងកន្លែងវប្បធម៌មួយចំនួនទៀតនឹងត្រូវបានអនុញ្ញាតឱ្យបើកដំណើរការឡើងវិញចាប់ពីពាក់កណ្តាលខែឧសភាដែលជាផ្នែកមួយនៃការបន្ធូរបន្ថយជាជំហានៗនៃការបិទប្រទេសដោយសារតែមេរោគវីរុសកូរ៉ូណានេះ។

លោក Kogler ប្រាប់អ្នកសារព័ត៌មានថាកាលបរិច្ឆេទជាក់លាក់មួយមិនទាន់ត្រូវបានកំណត់នៅឡើយទេដោយបន្ថែមថាព្រឹត្តិការណ៍ធំៗពាក់ព័ន្ធនឹងមនុស្សជាច្រើនដែលនៅជិតគ្នាដូចជាពិធីបុណ្យជាដើមនឹងនៅតែត្រូវបានហាមឃាត់រហូតដល់ថ្ងៃទី ៣១ ខែសីហា។ កាលពីថ្ងៃអង្គារសាធារណរដ្ឋអាល់ផិន (Alpine) ចាប់ផ្តើមបន្ធូរបន្ថយការបិទប្រទេសរបស់ខ្លួនដោយអនុញ្ញាតឱ្យហាង មជ្ឈមណ្ឌលសួនច្បារ និងហាងតូចៗបើកដំណើរការឡើងវិញ។ ហាងធំៗ និងហាងកាត់សក់ជាច្រើនទៀតក៏អាចបើកឡើងវិញចាប់ពីថ្ងៃទី ១ ខែឧសភានេះ។

ប្រទេសនេះនឹងតាមដានទៅលើកត្តាដែលបង្កើនល្បឿននៃការឆ្លង និងពន្យារពេលការបន្ធូរបន្ថយការបិទប្រទេសរបស់ខ្លួនជាជំហានៗ បើចាំបាច់។ ទីភ្នាក់ងាររ៉យទ័ររាយការណ៍ថាចំណុចនៃការឆ្លងមេរោគគឺរាប់បញ្ចូលទាំងរមណីយដ្ឋានជិះស្គីជាច្រើននៅ Ischgl, St Anton am Arlberg  និង Soelden ។ រដ្ឋមន្រ្តីក្រសួងសុខាភិបាលនិយាយកាលពីថ្ងៃព្រហស្បតិ៍ថាប្រទេសអូទ្រីសក៏មានគម្រោងធ្វើតេស្ត៍រាល់អ្នករស់នៅតាមផ្ទះដែលចូលនិវត្តន៍នៅពេលដែលខ្លួនពង្រីកកិច្ចខិតខំប្រឹងប្រែងដើម្បីវាស់វែងការរីករាលដាលនៃជំងឺរាតត្បាតនេះផងដែរ៕

ប្រភព RT ចុះផ្សាយថ្ងៃទី ១៧ ខែមេសា ឆ្នាំ ២០២០