ភ្នំពេញ៖ អាជ្ញាធរមូលដ្ឋានបាននិយាយថា មេបញ្ជាការនៃក្រុមសកម្មប្រយុទ្ធ Hizbul Mujahideen និងសកម្មប្រយុទ្ធ៣រូបផ្សេងទៀតត្រូវបាញ់សម្លាប់ ក្នុងប្រតិបត្តិការប្រឆាំងភេរវកម្មឥណ្ឌានៅតំបន់កាស្មៀរ ។
យោងតាមប្រភពរបាយការណ៍ក្នុងតំបន់បានអោយដឹងថា លោក Riyaz Naikoo ជាមេដឹកនាំក្រុមបំបែកខ្លួនធំជាងគេនៅតំបន់ Himalayan ដែលជាតំបន់មានជម្លោះ។ លោកត្រូវបានគេដាក់ឈ្មោះថាជាភេរវករ ហើយប៉ូលិសតំបន់ចាម៊ូ និងកាស្មៀរមានប្រាក់រង្វាន់ជិត ១៦ ០០០ ដុល្លារសម្រាប់ទិញក្បាលរបស់មេភេរវកររូបនេះ។
អាជ្ញាធរមូលដ្ឋាននិយាយថា លោក Naikoo មានជាប់ទាក់ទងនឹងករណីភេរវកម្ម និងបានដើរតួយ៉ាងសំខាន់ក្នុងការប្រើប្រាស់បណ្តាញសង្គមដើម្បីធ្វើការជ្រើសរើសសាមជិកចូលក្រុមនេះ ហើយលោកត្រូវបានគេចោទប្រកាន់ថា បានចូលរួមសម្លាប់មន្ត្រីពិសេស។
អធិការប៉ូលិសតំបន់កាស្មៀរលោក Vijay Kumar ប្រាប់ភ្នាក់ងារព័ត៌មានថា លោក Naikoo បានជាប់នៅក្នុងផ្ទះមួយ ហើយនៅព្រឹកនៃថ្ងៃការប្រយុទ្ធគ្នាដោយកាំភ្លើងបានកើតឡើង នៅពេលនោះហើយដែលលោក Naikoo និងសហការីរបស់គាត់ត្រូវបានសម្លាប់។
លោកបន្តទៀតថា មរណភាពរបស់លោក Naikoo ត្រូវបានគេចាត់ទុកថា ជាជោគជ័យដ៏ធំមួយសម្រាប់កងទ័ពនៅតំបន់កាស្មៀរ។ លោកបន្ថែមថា សកម្មប្រយុទ្ធចំនួនពីរនាក់ផ្សេងទៀតត្រូវបានសម្លាប់នៅក្នុងការបាញ់ប្រហារមួយនៅក្បែរនោះក្នុងពេលតែមួយ ដែលនាំឱ្យចំនួនសកម្មប្រយុទ្ធបំបែកខ្លួន ដែលត្រូវបានសម្លាប់នៅក្នុងការវាយឆ្មក់មានចំនួន៤នាក់។
ក្រោយពីប្រតិបត្តិការនេះចប់ នាយករដ្ឋមន្ត្រីប៉ាគីស្ថានលោក Imran Khan បានបង្ហោះសារនៅលើគណនី Twitter ផ្លូវការរបស់លោកថា “ ភាពមានៈរបស់ជនជាតិដើមកាស្មៀរប្រឆាំងនឹងការកាន់កាប់របស់ឥណ្ឌាបង្កឱ្យមានផលវិបាកផ្ទាល់ពីការគៀបសង្កត់ និងធ្វើឱ្យមានការធ្វើឃាតនៅតំបន់កាស្មៀររបស់ប្រទេសឥណ្ឌា” ៕
តំបន់ Himalayan គឺជាទឹកដីដែលមានជម្លោះរវាងប្រទេសឥណ្ឌា និងប៉ាគីស្ថានអស់រយៈពេលជាង៦០ឆ្នាំមកហើយដោយក្រុមបំបែកខ្លួនមួយចំនួនបានទាមទារឯករាជ្យភាពពេញលេញ ហើយអ្នកផ្សេងទៀតចង់គេចចេញពីការគ្រប់គ្រងរបស់ប្រទេសឥណ្ឌា និងទៅចូលរួមជាមួយប្រទេសប៉ាគីស្ថាន។ តំបន់នេះត្រូវបានបែងចែកជាពីរស្រុក ដោយស្រុកមួយស្ថិតនៅក្រោមការគ្រប់គ្រងរបស់ប្រទេសប៉ាគីស្ថាន និងមួយទៀតស្ថិតនៅក្រោមការគ្រប់គ្រងរបស់ប្រទេសឥណ្ឌា។
ទីក្រុង New Delhi បានដកហូតឋានៈពិសេសរបស់តំន់កាស្មៀរនៅឆ្នាំ២០១៩ ដោយដកស្វ័យភាពដែលកំណត់រួច និងដាក់ចេញនូវវិធានការសន្តិសុខតឹងរ៉ឹង ដែលនៅតែបន្តអនុវត្តនៅទីនោះ។ ការផ្លាស់ប្តូរនេះបង្កឱ្យមានភាពតានតឹងកើនឡើងកាន់តែខ្លាំងគួរឱ្យកត់សម្គាល់ជាមួយប្រទេសប៉ាគីស្ថាន រួមទាំងបង្កឱ្យមានការប៉ះទង្គិចយោធាមួយចំនួននៅតាមព្រំដែន៕
ប្រភពព័ត៌មានRT ផ្សាយថ្ងៃទី៦ ខែឧសភា ឆ្នាំ២០២០
