ប្រទេសអេស្បាញបានបន្តភាពអាសន្នក្នុងការប្រយុទ្ធប្រឆាំងនឹងជំងឺកូវីដ១៩ រយៈពេលពីរសប្តាហ៍ទៀត ដោយរាប់ចាប់ពីថ្ងៃអាទិត្យនេះ។ ការបន្តនេះធ្វើឱ្យរដ្ឋាភិបាលអាចគ្រប់គ្រងចលនារបស់ប្រជាជន ដែលមានការបន្ធូរបន្ថយជាបណ្តើរ។
សភាបានអនុម័តលើវិធានការណ៍នេះនៅថ្ងៃពុធ ក្រោយពីលោកនាយករដ្ឋមន្ត្រី Pedro Sanchez ដែលជាប្រមុខរដ្ឋាភិបាលចម្រុះផុយស្រួយទទួលបានការគាំទ្រគ្រប់ពីគណបក្សប្រឆាំង ដើម្បីអនុវត្តការបោះឆ្នោតនេះ។
នៅក្នុងប្រទេសអេស្បាញមានមនុស្សច្រើនជាងចំនួន ២៥ ០០០នាក់ បានស្លាប់ដោយសារការឆ្លងជំងឺកូវីដ១៩ និងស្ថិតនៅក្រោមការបិទដំណើរចាប់តាំងពីថ្ងៃទី១៤ ខែមីនា។ ស្ថានភាពអាសន្នបច្ចុប្បន្នដល់ពេលបញ្ចប់នៅពាក់កណ្តាលអធ្រាត្រថ្ងៃសៅរ៍។
ទោះបីជាស្ថានការណ៍កំពុងមានភាពប្រសើរឡើងក៏ដោយ លោក Sanchez មានប្រសាសន៍ថា វាមានភាពចាំបាច់ដែលត្រូវតែបន្តរក្សាការរឹតបន្តឹងខ្លះដើម្បីការពារមិនឱ្យមានការឆ្លងថ្មី៕
ប្រភពព័ត៌មាន RT ផ្សាយថ្ងៃទី៦ ខែឧសភា ឆ្នាំ២០២០
