អាជ្ញាធរបាននិយាយនៅថ្ងៃព្រហស្បតិ៍ថា តំបន់ទេសចរណ៍បុរាណក្នុងប្រទេសក្រិក រួមទាំងការកម្សាន្តឡើងភ្នំ Acropolis លើទីក្រុងអាតែននឹងបើកដំណើរការឡើងវិញនៅថ្ងៃទី១៨ ខែឧសភា។
រដ្ឋាភិបាលក្រិកបានប្រកាសបិទប្រាសាទបុរាណ និងសារមន្ទីរកាលពីពាក់កណ្តាលខែមីនា ដើម្បីទប់ស្កាត់ការរីករាលដាលនៃជំងឺកូវីដ១៩ ហើយសេចក្ដីប្រកាសថ្មីនេះគឺជាការបន្ធូរបន្ថយលើការរឹតត្បិតនឹងអនុវត្តបន្តិចម្តង។
រដ្ឋមន្ត្រីក្រសួងវប្បធម៌ លោក Lina Mendoni មានប្រសាសន៍ថា សារមន្ទីរនឹងបើកដំណើរនៅពាក់កណ្តាលខែមិថុនា ខណៈដែលការសម្តែងដោយបើកចំហនឹងចាប់ផ្តើមឡើងវិញនៅពាក់កណ្តាលខែកក្កដា ប៉ុន្តែលោកបន្ថែមថា ទោះយ៉ាងណាវិធានការណ៍រក្សាគម្លាតពីគ្នានឹងត្រូវបានអនុវត្ត។
តំបន់ប្រវត្តិសាស្ត្រគឺជាផ្នែកមួយដ៏សំខាន់នៃវិស័យទេសចរណ៍ដ៏សំខាន់របស់ប្រទេសក្រិក ហើយនឹងមានកិច្ចប្រឹងប្រែងជាច្រើនដើម្បីទាក់ទាញទឹកចិត្តភ្ញៀវទេសចរឱ្យទៅទស្សនា ក្រោយពីមានការរឹតត្បិតលើការធ្វើដំណើរ និងការបិទទ្វារ ដែលជាហេតុនាឱ្យបាត់បង់រាល់ការកក់នានា។
តន្ត្រីករ តារាសម្តែង និងសមាជិកសិល្បៈចំនួនរាប់រយនាក់បានប្រមូលផ្តុំគ្នានៅខាងក្រៅសភានៅថ្ងៃព្រហស្បតិ៍ដើម្បីទាមទារការគាំទ្របន្ថែមទៀតសម្រាប់វិស័យរបស់ពួកគេ៕
ប្រភពព័ត៌មាន RT ផ្សាយថ្ងៃទី០៧ ខែឧសភា ឆ្នាំ២០២០
