ប្រធានាធិបតីសហរដ្ឋអាមេរិក លោក Donald Trump ផ្តល់ជំនួយវេជ្ជសាស្ត្រទៅកាន់ប្រទេសរុស្ស៊ី ដើម្បីជួយប្រឆាំងនឹងជំងឺឆ្លងកូវីដ១៩ ក្រោយពីមានការជជែកឆ្លើយឆ្លងគ្នាតាមទូរស័ព្ទរវាងមេដឹកនាំសហរដ្ឋអាមេរិក និងប្រធានាធិបតីរុស្ស៊ីលោក Vladimir Putin នៅថ្ងៃព្រហស្បតិ៍។
យោងតាមសេចក្តីថ្លែងការណ៍បង្ហាញថា ប្រធានាធិបតីទាំងពីរក៏បានពិភាក្សាពីទីផ្សារប្រេងពិភពលោកផងដែរ ដោយកត់សម្គាល់ពីការគាំទ្ររបស់លោកទាំងពីរចំពោះកិច្ចព្រមព្រៀងទិន្នផលកាលពីខែមុនរវាងអង្គភាព OPEC និងរោងចក្រផលិតមិនមែនអង្គភាព OPEC ដោយមេដឹកនាំទាំងពីររូបបាននិយាយថា កត្តានេះបានជួយធ្វើឱ្យតម្លៃប្រេងមានស្ថេរភាព។
សេតវិមានបាននិយាយថាក៏មានការពិភាក្សាអំពីការឆ្លងរាតត្បាតនៃជំងឺកូវីដ១៩ ផងដែរ ហើយមេដឹកនាំនានាបានពិភាក្សាពីបំណងប្រាថ្នារបស់សហរដ្ឋអាមេរិកក្នុងការគ្រប់គ្រងអាវុធ។
លោក Judd Deere លេខាធិការរងរបស់សេតវិមានមានប្រសាសន៍ថា៖ “ប្រធានាធិបតី Trump បានបញ្ជាក់ជាថ្មីម្តងទៀតថា សហរដ្ឋអាមេរិកប្តេជ្ញាគ្រប់គ្រងមិនឱ្យមានការប្រើអាវុធប្រកបដោយប្រសិទ្ធភាព ដែលមិនមែនតែលើប្រទេសរុស្ស៊ីប៉ុណ្ណោះទេ ប៉ុន្តែក៏លើប្រទេសចិនផងដែរ ហើយទន្ទឹងរងចាំការពិភាក្សានាពេលអនាគតដើម្បីជៀសវាងការប្រកួតប្រជែងដណ្តើមអាវុធដែលមានតម្លៃថ្លៃ។
លោក Deere បន្ថែមថា លោក Trump ក៏បាននិយាយជាមួយលោក Putin ក្នុងការរំលឹក និងបញ្ជាក់ពីខួបលើកទី៧៥នៃទិវាជ័យជំនះអឺរ៉ុបផងដែរ៕
ប្រភពព័ត៌មាន RT ផ្សាយថ្ងៃទី០៧ ខែឧសភា ឆ្នាំ២០២០
