នៅថ្ងៃនេះ ក្រុមហ៊ុន Huawei បានប្រកាសថា ខ្លួនបានដាក់ពាក្យបណ្តឹងទៅតុលាការសហព័ន្ធសហរដ្ឋអាមេរិក ប្រឆាំងនឹងធម្មនុញ្ញភាពនៃមាត្រា 889 នៃច្បាប់អនុញ្ញាតការពារជាតិឆ្នាំ ២០១៩ (NDAA) ។ តាមរយៈសកម្មភាពនេះ ក្រុមហ៊ុន Huawei ស្វែងរកសាលក្រម ប្រកាសថាការដាក់កំហិតទៅលើក្រុមហ៊ុន Huawei គឺមិនសមស្របតាមរដ្ឋធម្មនុញ្ញ និងការបង្គាប់បញ្ជាជាអចិន្ត្រៃយ៍ប្រឆាំងនឹងការរឹតត្បិតទាំងនេះ។
លោក Guo Ping ប្រធានប្តូរវេននៃក្រុមហ៊ុន Huawei បានថ្លែងថា៖ “សភាសហរដ្ឋអាមេរិកបានបរាជ័យ ក្នុងការបង្កើតភស្តុតាងដើម្បីគាំទ្រការរឹតបន្តឹងរបស់ខ្លួន ចំពោះផលិតផលរបស់ក្រុមហ៊ុន Huawei ។ យើងត្រូវបានបង្ខំឱ្យចាត់វិធានការផ្លូវច្បាប់នេះ ជាមធ្យោបាយត្រឹមត្រូវ និងចុងក្រោយ”។
លោកបានបន្ថែមថា៖ “ការហាមឃាត់នេះ មិនត្រឹមតែជាអំពើខុសច្បាប់ប៉ុណ្ណោះទេ វាក៏ជាការហាមឃាត់ក្រុមហ៊ុន Huawei មិនឱ្យចូលរួមប្រកួតប្រជែងដោយយុត្តិធម៌ ដែលធ្វើឱ្យប៉ះពាល់ដល់អតិថិជនអាមេរិកផងដែរ។ យើងទន្ទឹងរង់ចាំសាលក្រមរបស់តុលាការ ហើយជឿជាក់ថា វានឹងផ្តល់អត្ថប្រយោជន៍ដល់ក្រុមហ៊ុន Huawei និងប្រជាជនអាមេរិក”។
ពាក្យបណ្តឹងនេះត្រូវបានដាក់ទៅកាន់តុលាការទីក្រុង Plano នៃរដ្ឋតិចសាស់។ យោងទៅតាមពាក្យបណ្តឹងនេះ មាត្រា 889 នៃ NDAA 2019 គឺមិនត្រឹមតែរារាំងភ្នាក់ងាររបស់រដ្ឋាភិបាលសហរដ្ឋអាមេរិកទាំងអស់ពីកាការទិញឧបករណ៍ និងសេវាកម្មរបស់ក្រុមហ៊ុន Huawei ប៉ុណ្ណោះទេ ថែមទាំងរារាំងពួកគេមិនឱ្យចុះកិច្ចសន្យាជាមួយ ឬផ្តល់ជំនួយ ឬប្រាក់កម្ចីដល់ភាគីទីបីដែលទិញឧបករណ៍ ឬសេវាកម្មរបស់ក្រុមហ៊ុន Huawei ដោយគ្មានដំណើរការ ឬនីតិវិធីតុលាការ។
វាក៏បានរំលោភលើគោលការណ៍នៃបែកចែកអំណាច ដែលបានដាក់តម្កល់នៅក្នុងរដ្ឋធម្មនុញ្ញរបស់សហរដ្ឋអាមេរិកផងផងដែរ ពីព្រោះសភាបង្កើតច្បាប់ហើយព្យាយាមធ្វើការវិនិច្ឆ័យ និងកាត់សេចក្តីតែម្តង។
លោក Song Liuping ប្រធានផ្នែកច្បាប់របស់ក្រុមហ៊ុន Huawei បានសង្កត់ធ្ងន់ថា៖ “មាត្រា 889 គឺផ្អែកលើការណ៍មិនពិតជាច្រើន មិនមានភស្តុតាង និងមិនទាន់ផ្ទៀងផ្ទាត់ឲ្យបានច្បាស់លាស់ទាល់តែសោះ។ ផ្ទុយពីបរិយាកាសរបស់ច្បាប់ ក្រុមហ៊ុន Huawei មិនត្រូវបានគ្រប់គ្រង ឬរងឥទ្ធិពលពីសំណាក់រដ្ឋាភិបាលចិនទេ។ លើសពីនេះទៀត ក្រុមហ៊ុន Huawei មានកំណត់ត្រាប្រព័ន្ធសុវត្ថិភាព និងកម្មវិធីល្អបំផុត។ មិនមានភស្តុតាងផ្ទុយពីច្បាប់ណាមួយដែលត្រូវបានរកឃើញឡើយ”។
លោក John Suffolk បុគ្គលិកផ្នែកសុវត្ថិភាពតាមអ៊ីនធឺណេតនៃក្រុមហ៊ុន Huawei បានបន្ថែមថា ” យើងមានមោទនភាពដែលយើងជាក្រុមហ៊ុនបើកចំហ មានតម្លាភាព បានទទួលការគាំទ្រ និងមានការចាប់អារម្មណ៍បំផុតនៅក្នុងពិភពលោក” ។ ហើយយើងបានបង្កើតប្រព័ន្ធសុវត្ថិភាពដែលមានស្តង់ដារខ្ពស់មួយ ដែលមានតែក្រុមហ៊ុនតែប៉ុន្មានប៉ុណ្ណោះដែលអាចធ្វើបាន។”
សម្រាប់ Huawei ការដាក់កំហិតដែលបានចែងនៅក្នុង NDAA គឺបានរារាំងក្រុមហ៊ុនពីការផ្គត់ផ្គង់បច្ចេកវិទ្យា 5G ឈានមុនគេ ដល់ប្រជាជនអាមេរិក ដែលការដាក់កំហិតនេះនឹងពន្យារពេលដល់ការដាក់ឲ្យដំណើរការបច្ចេកវិទ្យា 5G ហើយនិងរារាំងដល់កិច្ចខិតខំប្រឹងប្រែងដើម្បីកែលម្អដំណើរការបច្ចេកវិទ្យា 5G នៅសហរដ្ឋអាមេរិកទៀតផង។
លើសពីនេះទៅទៀត អ្នកប្រើប្រាស់បណ្តាញសេវានៅតំបន់ជនបទ និងតំបន់ដាច់ស្រយាលនៅអាមេរិក នឹងត្រូវបង្ខំឲ្យជ្រើសរើស រវាងជំនួយផ្នែកហរិញ្ញវត្ថុរបស់រដ្ឋាភិបាល និងផលិតផលដែលមានគុណភាពខ្ពស់តែមានតម្លៃសមរម្យ។ សកម្មភាពនេះ នឹងធ្វើឲ្យរាំងស្ទះដល់ដំណើរការក្នុងការធ្វើឲ្យបណ្តាញសេវាកាន់តែល្អប្រសើរ ក៏ដូចជាការពង្រីកវិសាលភាពនៃបច្ចេកវិទ្យាឌីជីថល។ កាន់តែអាក្រក់ជាងនេះទៅទៀត ការដាក់កំហិតទាំងនេះលើក្រុមហ៊ុន Huawei នឹងធ្វើឲ្យការប្រកួតប្រជែងកាន់តែមានភាពតានតឹង ដែលធ្វើឲ្យប្រជាជនអាមេរិកត្រូវចំណាយកាន់តែច្រើនលើផលិតផលដែលមិនសូវមានគុណភាពខ្ពស់។
ការប៉ាន់ស្មានពីប្រភពជាច្រើននៅក្នុងឧស្សាហកម្មនេះ បានបង្ហាញថា ការអនុញ្ញាតឲ្យ Huawei ហក់ចូលក្នុងការប្រកួតប្រជែង នឹងអាចកាត់បន្ថយតម្លៃក្នុងការកសាងហេដ្ឋារចនាសម្ព័ន្ធបច្ចេកវិទ្យាទំនាក់ទំនងឥតខ្សែពី ១៥% ទៅ ៤០%ឯណោះ។ នេះអាចជួយអាមេរិកខាងជើង សន្សំការចំណាយបានយ៉ាងហោចណាស់ក៏ ២០ ពាន់លានដុល្លាដែរនៅក្នុងរយៈពេលបួនឆ្នាំខាងមុខ។
លោក Guo Ping បានបន្ថែមទៀតថា៖ ” ប្រសិនបើច្បាប់នេះត្រូវបានគេច្រានចោល ក្រុមហ៊ុន Huawei អាចនឹងនាំមកនូវបច្ចេកវិទ្យាឈានមុខកាន់តែច្រើនទៅកាន់អាមេរិក និងជួយកសាងបណ្តាញសេវា 5G បានយ៉ាងល្អជាទីបំផុត។ ក្រុមហ៊ុន Huawei មានបំណងចង់ជួយដោះស្រាយរាល់ការព្រួយបារម្ភទាំងឡាយរបស់រដ្ឋាភិបាលលើលើបញ្ហាសន្តិសុខ។ ការលើកលែងលើបម្រាមដែលមាននៅក្នុង NDAA នឹងធ្វើឲ្យរដ្ឋាភិបាលអាមេរិកងាយស្រួលក្នុងការធ្វើការជាមួយ Huawei និងដើម្បីដោះស្រាយបញ្ហាសន្តិសុខដ៏ពិតប្រាកដ”៕
![](https://i0.wp.com/cdn.nctc.gov.kh/2019/03/5c80cfb2b7f9f_1551945600_large.jpg?resize=696%2C392&ssl=1)