កងទ័ពលីប៊ីភាគខាងកើតដកកំលាំងចេញពីតំបន់មួយចំនួនក្នុងទីក្រុងទ្រីប៉ូលីត្រឹមរយៈពេលមួយយប់ ក្រោយពីពួកគេបានបាត់បង់បន្ទាយដ៏សំខាន់មួយនៅភាគខាងលិចប្រទេសលីប៊ីនៅថ្ងៃចន្ទ។
ភ្នាក់ងារសារព័ត៌មានដកស្រង់ប្រសាសន៍របស់អ្នកនាំពាក្យកងទ័ពជាតិលីប៊ី (LNA) លោក Ahmed al-Mismari ថា កងទពបានអនុវត្តការបែងចែកកំលាំង និងការរុះរើទៅទីតាំងថ្មីនៅសមរភូមិ ដោយដកខ្លួនចេញពីតំបន់លំនៅឋានដែលមានមនុស្សច្រើន។
ភ្នាក់ងារសារព័ត៌មានរាយការណ៍ថា មេបញ្ជាការលោក Khalifa Haftar របស់ក្រុម LNA បានធ្វើការប្រយុទ្ធអស់រយៈពេលច្រើនជាងមួយឆ្នាំដើម្បីដណ្តើមយកទីក្រុងទ្រីប៉ូលីដែលជាអាសនៈរបស់រដ្ឋាភិបាលនៃកិច្ចព្រមព្រៀងជាតិ (GNA) ដែលជារដ្ឋាភិបាលមានការទទួលស្គាល់ពីអង្គការសហប្រជាជាតិហើយកងកំលាំងរបស់លោកមេបញ្ជាការ Haftar បានធ្វើសកម្មភាពចាប់តាំងពីខែមករា ដោយមានជំនួយយោធាពីប្រទេសទួរគី។
នៅថ្ងៃចន្ទ កងកំលាំងគាំទ្រក្រុមរដ្ឋាភិបាល GNA បានកាន់កាប់មូលដ្ឋានអាកាសយានដ្ឋាន Watiya នៅភាគខាងលិចនៃរដ្ឋធានី ក្រោយពីមានការរប៉ុនប៉ងអស់រយៈពេលច្រើនសប្តាហ៍ រហូតដល់ពួកគេបានបោះជំហានទៅមុខបានមួយកំរិតក្នុងរយៈពេលមួយឆ្នាំ ហើយពួកគេអាចដណ្តើមបានមូលដ្ឋានអាកាសតែមួយគត់របស់ខ្លួន LNA នៅជិតទីក្រុងទ្រីប៉ូលី។
យោងទៅតាមប្រភពលោក Mismari បញ្ជាក់ថា មូលដ្ឋាននោះធ្លាប់ត្រូវបានគេបោះបង់ចោលដែលវាជាផ្នែកមួយនៃការសំរេចចិត្តជាយុទ្ធសាស្ត្រ ដែលបានគ្រោងទុកជាយូរមកហើយ និងមានតែឧបករណ៍ចាស់ៗប៉ុណ្ណោះដែលត្រូវបានគេទុកចោលនៅទីនោះ៕
ប្រភពព័ត៌មាន RT ផ្សាយថ្ងៃទី១៩ ខែឧសភា ឆ្នាំ២០២០
