យ៉ាងហោចណាស់មានមនុស្សចំនួន៣០នាក់បានរងរបួសនៅក្នុងការវាយប្រហារដោយគ្រាប់បែកដៃទៅលើក្រុមបាតុកម្មមួយនៅទីក្រុង Karachi នៅថ្ងៃពុធ ទី០៥ ម្សិលមិញ ខណៈដែលប្រទេសប៉ាគីស្ថានបានប្រារព្ធខួបលើកទី០១នៃការដកហូតស្វ័យភាពលើតំបន់កាស្មៀរបស់ប្រទេសឥណ្ឌា។
មន្ត្រីមន្ទីរសុខាភិបាលខេត្តនិយាយថា អ្នករងរបួសត្រូវបានបញ្ជូនទៅមន្ទីរពេទ្យផ្សេងៗគ្នា ខណៈដែលមានមនុស្សម្នាក់ស្ថិតក្នុងស្ថានភាពធ្ងន់ធ្ងរ។
លោក Ghulam Nabi Memon មេប៉ូលិសក្រុង Karachi ប្រាប់ភ្នាក់ងារសារព័ត៌មានថា៖ “គ្រាប់បែកដៃមួយគ្រាប់ត្រូវបានបំផ្ទុះនៅក្នុងក្រុមបាតុកម្មដែលបណ្តាលឲ្យមានមនុស្សស្លាប់ និងរបួសជាច្រើននាក់” ការវាយប្រហារនេះអះអាងដោយកងទ័ពបដិវត្ត Sindhudesh ដែលជាក្រុមបំបែកខ្លួន និងចាប់ផ្តើមធ្វើសកម្មភាពនៅរយៈពេលប៉ុន្មានខែមុន។
នៅខែមិថុនា មនុស្សចំនួន០៤នាក់ត្រូវបានសម្លាប់ ដោយក្នុងនោះមានទាហានចំនួន០២នាក់នៅក្នុងហេតុការណ៍ផ្ទុះចំនួន០៣ដងជាប់ៗគ្នា ហើយក្រោយមកត្រូវបានអះអាងដោយក្រុម SRA ។ ក្រុមនេះចង់អោយខេត្ត Sindh នៅក្នុងក្រុង Karachi ជារដ្ឋធានីធ្វើការផ្តាច់ខ្លួនចេញពីសហព័ន្ធប៉ាគីស្ថាន។ ក្រុមនេះថែមទាំងបានប្រកាសពីសម្ព័ន្ធភាពរបស់ពួកគេជាមួយកងទ័ពរំដោះ Balochistan Liberation Army ដែលជាក្រុមសកម្មប្រយុទ្ធដើម្បីស្វ័យភាពកាន់តែប្រសើរសម្រាប់តំបន់ Balochistan នៅភាគនិរតីនៃប្រទេសប៉ាគីស្ថាន។
ការវាយប្រហារបានកើតឡើងនៅពេលការប្រមូលផ្តុំស្រដៀងគ្នានៅទូទាំងប្រទេស។
បាតុកម្មនៅក្នុងក្រុង Karachi រៀបចំឡើងដោយក្រុម Jamaat-e-Islami ដែលជាគណបក្សស្តាំនិយមខាងសាសនាត្រូវបានអំពាវនាវឲ្យបញ្ឈប់ក្រោយពីមានការវាយប្រហារនោះបានកើតឡើង។
គួររំលឹកផងដែរថា នៅខែសីហា រដ្ឋាភិបាលរបស់នាយករដ្ឋមន្ត្រីឥណ្ឌាលោក Narendra Modi បានដកហូតតំបន់ Jammu និងតំបន់ Kashmir ដែលជារដ្ឋដែលមានជនជាតិភាគតិចមូស្លីមភាគច្រើន ហើយពួកគេមានសិទ្ធិពិសេស និងបានបែងចែកជាទឹកដីគ្រប់គ្រងដោយសហព័ន្ធចំនួនពីរ៕
ប្រែសម្រួល៖ ប៉ោក លក្ខិណា
