នៅព្រឹកថ្ងៃអាទិត្យ ទី០៩ ខែសីហា សប្តាហ៍មុនមានហេតុការណ៍បាញ់ប្រហារមួយបានកើតឡើងនៅភាគអាគ្នេយ៍នៃទីក្រុងវ៉ាស៊ីនតោនបណ្តាលឲ្យក្មេងជំទង់ម្នាក់ស្លាប់ និងមនុស្សចំនួន២០នាក់ផ្សេងទៀតរងរបួស។
យោងតាមប្រភពព័ត៌មានពីអាជ្ញាធរ និងប្រព័ន្ធផ្សព្វផ្សាយក្នុងស្រុកបានឲ្យដឹងថា យុវជនអាយុ១៧ឆ្នាំម្នាក់ត្រូវបានសម្លាប់ខណៈដែលមនុស្សយ៉ាងតិចចំនួន២០នាក់រងរបួសបន្ទាប់ពីមានហេតុការណ៍បាញ់ប្រហារមួយនៅភាគអាគ្នេយ៍ទីក្រុងវ៉ាស៊ីនតោននៅព្រឹកថ្ងៃអាទិត្យ ទី០៩ ខែសីហា សប្តាហ៍មុន។
ប៉ូលិសនៅក្នុងតំបន់និយាយថា ការបាញ់ប្រហារកើតឡើងនៅម៉ោង ១រសៀលម៉ោងក្នុងស្រុក (ម៉ោងសាកល ៥ល្ងាច) នៅថ្ងៃអាទិត្យក្នុងសង្កាត់មួយនៅរដ្ឋធានីសហរដ្ឋអាមេរិក។
អ្នកនាំពាក្យប៉ូលិសបាននិយាយថា យ៉ាងហោចណាស់មានមនុស្ស ០៩នាក់ត្រូវគេនាំទៅកាន់មន្ទីរពេទ្យក្បែរនោះ នេះបើយោងតាមការដកស្រង់សម្តីប៉ូលិសរបស់វិទ្យុ CNN។
ប្រភពវិទ្យុបានដកស្រង់សម្តីរបស់លោក Nelson Bostic ដែលរស់នៅក្នុងសង្កាត់នោះថា “ ខ្ញុំបានឃើញនារីវ័យក្មេងម្នាក់នាងត្រូវបានគេបាញ់ចំជើង។ បុរសវ័យក្មេងម្នាក់ដេកស្តូកស្តឹងលើឡានរបស់គាត់ ហើយសម្លេងស្តាប់ទៅដូចជាកាំភ្លើងយន្តអញ្ចឹង។ គាត់ប្រាប់ប្រភព WTOP-FM ថា ឧប្បត្តិហេតុនេះបានកើតឡើងនៅក្នុងពិធីខួបកំណើត។
ពុំទាន់មានព័ត៌មានលំអិតបន្ថែមទៀតភ្លាមៗនោះទេ។
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ផ្សាយថ្ងៃទី០៩ ខែសីហា ឆ្នាំ២០២០
