ទាហានសហរដ្ឋអាមេរិក ចំនួន០៤នាក់រងរបួសពីឧបទ្ទវហេតុបុកជាមួយរថយន្តយោធារុស្ស៊ីនៅក្នុងប្រទេសស៊ីរីនៅថ្ងៃអង្គារ។
ប្រភព POLITICO បានអោយដឹងថា សមាជិកកងទ័ពចំនួន០៤នាក់ត្រូវគេធ្វើរោគវិនិច្ឆ័យឃើញថា រងការប៉ះទង្គិចស្រាលក្រោយពីឧប្បត្តិហេតុកើតឡើងរួច។
សេចក្តីថ្លែងការណ៍បានបញ្ចាក់ថា រថយន្ដរុស្ស៊ីបានដេញតាមរថយន្តរបស់កងកម្លាំងសហរដ្ឋអាមេរិក ហើយរថយន្ដរុស្ស៊ីមានចេតនាវាយលុករថយន្ដរបស់កងកម្លាំងចម្រុះបណ្តាលឱ្យសមាជិកកងទ័ពសហរដ្ឋអាមេរិកចំនួន០៤នាក់រងរបួស។
ឃ្លីបវីដេអូដែលគេប្រទះឃើញលើបណ្តាញសង្គម Twitter បានបង្ហាញថា ពីរថយន្តរបស់សហរដ្ឋអាមេរិក ដោយរថយន្តរបស់រុស្ស៊ីបានដេញតាមពីក្រោយ និងប៉ុនប៉ងបិទផ្លូវអមដោយឧទ្ធម្ភាគចក្ររុស្ស៊ីនៅពីលើនៅក្នុងប្រទេសស៊ីរី។
មន្ទីរបញ្ចកោណបានបដិសេធមិនធ្វើអត្ថាធិប្បាយ ឬបញ្ជាក់ពីវីដេអូរនោះទេ។
លោក Mark Milley ប្រធានអគ្គសេនាធិការចម្រុះបានហៅទូរស័ព្ទទៅកាន់សមភាគីរុស្ស៊ីលោក Valery Gerasimov នៅថ្ងៃពុធ។ អ្នកនាំពាក្យអគ្គសេនាធិការចម្រុះលោក DeDe Halfhill មានប្រសាសន៍ថា៖ “ យោងតាមការអនុវត្តកន្លងមក អ្នកទាំងពីរបានយល់ព្រមរក្សាព័ត៌មានលម្អិតជាក់លាក់នៃការសន្ទនារបស់ពួកគេជាលក្ខណៈឯកជន” ។
លោក Kenneth Ekman មេបញ្ជាការរងនៃប្រតិបត្តិការរួមគ្នានៃក្រុមការងារចម្រុះរួមគ្នាបាននិយាយនៅខែមុនថា កងកម្លាំងទ័ពសហរដ្ឋអាមេរិកនៅប្រទេសស៊ីរីបានឆ្លើយតបជាមួយជនជាតិរុស្ស៊ីស្ទើរតែរាល់ថ្ងៃ ហើយភាគច្រើនមានស្ថានភាពវិវាទជាមួយគ្នា។
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ផ្សាយថ្ងៃទី២៧ ខែសីហា ឆ្នាំ២០២០
