មនុស្សចំនួន០២នាក់ស្លាប់នៅល្ងាចថ្ងៃព្រហស្បតិ៍ ទី២៧ ម្សិលមិញនេះ នៅក្នុងហេតុការណ៍ប៉ះទង្គិចប្រដាប់អាវុធរវាងកុលសម្ព័ន្ធអារ៉ាប់និកាយស៊ុននី និងអ្នកគាំទ្រគណបក្ស ស៊ីអ៊ីតនៅភាគខាងត្បូងនៃរដ្ឋធានី Beirut ក្នុងប្រទេសលីបង់។
ភ្នាក់ងារសារព័ត៌មានជាតិបានរាយការណ៍ថា មនុស្សចំនួន ០៣នាក់ផ្សេងទៀតបានរងរបួសផងដែរនៅក្នុងការប៉ះទង្គិចគ្នារវាងកុលសម្ព័ន្ធស៊ុននី និងក្រុមនិកាយស៊ីអ៊ីតនៃក្រុម Hezbollah និងក្រុម Amal នៅលើផ្លូវ Khalde។
សូមបញ្ជាក់ថា ជម្លោះនេះកើតឡើងបណ្តាលមកពីកុលសម្ព័ន្ធអារ៉ាប់ស៊ុននីបានរារាំងអ្នកគាំទ្ររបស់ក្រុមនិកាយស៊ីអ៊ីតពីការព្យួរបដានៅក្នុងតំបន់នោះសម្រាប់ពិធីបុណ្យអាស៊ូរ៉ា(Ashura)ដែលជាពិធីបុណ្យរបស់និកាយស៊ីអ៊ីតរំលឹកដល់ការស្លាប់របស់លោកImam Hussein ជាចៅប្រុសរបស់លោក Prophet Mohammed ។
កងទ័ពលីបង់បានពង្រាយនៅទីតាំងកើតហេតុ ខណៈដែលផ្លូវ Khalde ត្រូវបានបិទ ហើយចរាចរណ៍ត្រូវបានបង្វែរទៅផ្លូវតាមមាត់សមុទ្រដើម្បីការពារសុវត្ថិភាពរបស់ប្រជាជនក្នុងពេលមានការប៉ះទង្គិចគ្នា។
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua
