នៅថ្ងៃអាទិត្យ ទី២០ ខែកញ្ញា ម្សិលមិញនេះ ប្រទេសអ៊ីស្រាអែលបានជំរុញឱ្យប្រទេសមហាអំណាចអឺរ៉ុបទទួលស្គាល់ការប្រកាសជាឯកតោភាគីរបស់សហរដ្ឋអាមេរិកជុំវិញការបន្តដាក់ទណ្ឌកម្មរបស់ក្រុមប្រឹក្សាសន្តិសុខអង្គការសហប្រជាជាតិប្រឆាំងនឹងប្រទេសអ៊ីរ៉ង់។
នៅក្នុងសេចក្តីថ្លែងការណ៍មួយចេញផ្សាយដោយការិយាល័យរបស់លោករដ្ឋមន្ត្រីការបរទេសអ៊ីស្រាអែល Gabi Ashkenazi បានអំពាវនាវដល់សម្ព័ន្ធមិត្តអ៊ីស្រាអែលដែល គេស្គាល់ថាជាប្រទេស E-3 មានដូចជា ប្រទេសបារាំង ចក្រភពអង់គ្លេស និងអាល្លឺម៉ង់ឲ្យដកថយពីការប្រឆាំង និងធ្វើការឆ្ពោះទៅរកការអនុវត្តយ៉ាងតឹងរឹងនូវការដាក់ទណ្ឌកម្ម។
លោកបានជំរុញដល់ប្រទេសទាំងនោះធ្វើការដាក់ទណ្ឌកម្មឡើងវិញកម្រិតថ្នាក់ជាតិក៏ដូចជានៅកម្រិតសហគមន៍អ៊ឺរ៉ុប និងតាមរយៈយន្តការអង្គការសហប្រជាជាតិ។ ការអំពាវនាវរបស់លោកធ្វើឡើងក្រោយពីរដ្ឋមន្ត្រីក្រសួងការបរទេសសហរដ្ឋអាមេរិកលោក Mike Pompeo អះអាងថា រាល់ការដាក់ទណ្ឌកម្មមុនឆ្នាំ២០១៥ ប្រឆាំងនឹងប្រទេសអ៊ីរ៉ង់ត្រូវបានរៀបចំឡើងវិញ។
ទោះយ៉ាងណា ប្រទេសសមាជិកភាគច្រើននៃក្រុមប្រឹក្សាសន្តិសុខអង្គការសហប្រជាជាតិបាននិយាយថា ការផ្លាស់ប្តូររបស់លោក Pompeo គឺផ្អែកលើយន្តការដែលដោយផ្នែកនៃកិច្ចព្រមព្រៀងនុយក្លេអ៊ែរឆ្នាំ២០១៥ រវាងប្រទេសអ៊ីរ៉ង់ និងប្រទេសមហាអំណាចពិភពលោក ។ នេះមានន័យថា ការប្រកាសរបស់លោក(លោក Pompeo)ពុំមានសុពលភាពទេ។
រដ្ឋាភិបាលរបស់នាយករដ្ឋមន្ត្រីអ៊ីស្រាអែលលោក Benjamin Netanyahu បានចាត់ទុកប្រទេសអ៊ីរ៉ង់ជាគូប្រជែងរបស់ខ្លួន ហើយថែមទាំងបានអំពាវនាវជាយូរមកហើយទៅដល់សហគមន៍អន្តរជាតិឱ្យដាក់ទណ្ឌកម្មលើសាធារណរដ្ឋអ៊ីស្លាម។
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី២១ ខែកញ្ញា ឆ្នាំ២០២០
