នៅថ្ងៃពុធ ទី២៣ បុរសប្រដាប់អាវុធម្នាក់មិនស្គាល់អត្តសញ្ញាណបើកការបាញ់ប្រហារនៅក្នុងប្រទេសអាហ្វហ្គានីស្ថាន ដោយបានសម្លាប់មនុស្សចំនួន០៣នាក់ និងបណ្តាលឲ្យមនុស្សចំនួន០១នាក់រងរបួស។
លោក Mohammad Hashim ប្រធានប៉ូលិស Zaray ប្រាប់ភ្នាក់ងារព័ត៌មានថា ជនសង្ស័យជាសមាជិកក្រុមសកម្មប្រយុទ្ធ បានបាញ់សម្លាប់មន្ត្រីប៉ូលិសម្នាក់នៅក្នុងសួនច្បារមួយក្បែរផ្ទះរបស់គាត់ក្នុងស្រុក Zaray នៅល្ងាចថ្ងៃអង្គារ។
ប៉ូលិសស្រុកបានបើកការស៊ើបអង្កេតលើហេតុការណ៍បាញ់នៅក្នុងតំបន់ដែលមានចម្ងាយ ៤៥០គីឡូម៉ែត្រខាងត្បូងទីក្រុងកាប៊ុល(Kabul)។ អ្នកស្រុកម្នាក់បញ្ជាក់ប្រាប់ភ្នាក់ងារព័ត៌មានថា ស្របពេលដំណាលគ្នានោះ អ្នកបង្ហាត់ក្បាចគុណកុងហ្វូម្នាក់ និងសិក្ខាកាមម្នាក់ដែលមានអាយុ១៥ឆ្នាំត្រូវគេបាញ់សម្លាប់នៅល្ងាចថ្ងៃអង្គារក្នុងតំបន់ Kampani ។
កូនប្រុសអាយុ០៧ឆ្នាំរបស់គ្រូបង្វឹកបានរងរបួសនៅក្នុងហេតុការណ៍បាញ់ប្រហារដែល កើតឡើងនៅខាងក្រៅក្លឹបកីឡារបស់គាត់នៅក្នុងសង្កាត់ដែលមានប្រជាជនរស់នៅ។
សង្កាត់នៅភាគខាងលិចនៃទីក្រុងកាប៊ុលមានហេតុការណ៍វាយប្រហារភេរវកម្មជាច្រើនបានកើតឡើងរួមមានការធ្វើឃាត និងការបំផ្ទុះគ្រាប់បែកក្នុងប៉ុន្មានឆ្នាំថ្មីៗនេះ។
ពុំទាន់មាននរណាម្នាក់អះអាងទទួលខុសត្រូវចំពោះឧប្បត្តិហេតុនេះនៅឡើយទេ។
ក្រុមសកម្មប្រយុទ្ធនៃក្រុមតាលីបង់ និងរដ្ឋអ៊ីស្លាម (IS) បានធ្វើការវាយប្រហារកំណត់គោលដៅជាច្រើនប្រឆាំងនឹងជនស៊ីវិល និងមន្ត្រីយោធានៅក្នុងរយៈពេលប៉ុន្មានឆ្នាំថ្មីៗនេះ ដោយផ្តោតគោលដៅទៅលើអ្នកដែលធ្វើការឱ្យរដ្ឋាភិបាល អង្គការណាតូ និងកងទ័ពដឹកនាំដោយសហរដ្ឋអាមេរិក។
គួររំលឹកផងដែរថា មនុស្សចំនួន ៣៥នាក់ត្រូវគេសម្លាប់នៅក្នុងការវាយប្រហារកំណត់គោលដៅក្នុងខែមុននៅទូទាំងប្រទេសអាហ្វហ្គានីស្ថាន។
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី២៣ ខែកញ្ញា ឆ្នាំ២០២០
