អ្នកតំណាងជាន់ខ្ពស់សម្ព័ន្ធស៊ីវិលរបស់អង្គការសហប្រជាជាតិលោកMiguel Moratinos នៅថ្ងៃអង្គារ ទី០៣ ខែវិច្ចិកានេះធ្វើការថ្កោលទោសលើការវាយប្រហារភេរវកម្មនៅទីក្រុងវីយែនក្នុងប្រទេសអូទ្រីស។
លោកស្រីអ្នកនាំពាក្យមានប្រសាសន៍នៅក្នុងសេចក្តីថ្លែងការណ៍មួយថា លោក Moratinos បង្ហាញសេចក្តីរន្ធត់ និងតក់ស្លុតចំពោះការវាយប្រហារភរវកម្មដែលបានសម្លាប់មនុស្សជាច្រើននាក់ និងបណ្តាលឲ្យមនុស្សជាច្រើននាក់រងរបួស។
សេចក្តីថ្លែងការណ៍បន្ថែមថា លោក Moratinos បានថ្កោលទោសយ៉ាងខ្លាំងចំពោះឧក្រិដ្ឋកម្មដែលគួរឱ្យស្អប់ខ្ពើម ហើយលោកថែមទាំងបានសង្កត់ធ្ងន់ថា សកម្មភាពភេរវកម្មបែបនេះមិនអាចទទួលយកបាន និងមិនសមហេតុផលបើទោះបីជាវាកើតឡើងនៅពេលណា និងនៅទីកន្លែងណាក៏ដោយ។
ក្នុងនាមជាសម្ព័ន្ធអង្គការសហប្រជាជាតិ អ្នកតំណាងជាន់ខ្ពស់រូបនេះបានចូលរួមរំលែកទុក្ខយ៉ាងក្រៀមក្រំចំពោះក្រុមគ្រួសារជនរងគ្រោះ និងធ្វើការជូនពរអ្នកដែលរងរបួសឲ្យបានជាសះស្បើយឆាប់រហ័ស។ សេចក្តីថ្លែងការណ៍បន្ថែមថា លោកក៏បានបង្ហាញនូវការអាណិតអាសូរ និងសាមគ្គីភាពជាមួយប្រជាជន និងរដ្ឋាភិបាលអូទ្រីស៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី០៤ ខែវិច្ឆិកា ឆ្នាំ២០២០
