នៅថ្ងៃចន្ទ ទី០៩ ដើមសប្តាហ៍នេះក្រសួងការបរទេសអេហ្ស៊ីបធ្វើការថ្កោលទោសខ្លាំងបំផុតលើការវាយប្រហារដែលកើតឡើងនៅភាគនិរតីនៃរដ្ឋធានីបាកដាដប្រទេសអ៊ីរ៉ាក់។
ក្រសួងការបរទេសនិយាយក្នុងសេចក្តីថ្លែងការណ៍មួយថា ប្រទេសអេហ្ស៊ីបបន្តធ្វើការគាំទ្រដល់ប្រទេសអ៊ីរ៉ាក់នៅក្នុងការចាត់វិធានការចាំបាច់ណាមួយដើម្បីប្រយុទ្ធប្រឆាំងនឹងសកម្មភាពភេរវកម្មគ្រប់រូបភាពដើម្បីថែរក្សាស្ថេរភាព និងសន្តិសុខរបស់ប្រទេស។
រដ្ឋាភិបាលអេហ្ស៊ីប និងប្រជាជនអេហ្ស៊ីបបានសម្តែងការចូលរួមរំលែកទុក្ខជាមួយរដ្ឋាភិបាលអ៊ីរ៉ាក់ និងប្រជាជនអ៊ីរ៉ាក់ចំពោះឧប្បត្តិហេតុដ៏សាហាវនេះ ហើយថែមទាំងបានជូនពរដល់អ្នករងរបួសឱ្យបានឆាប់ជាសះស្បើយ។
សូមរំលឹកផងដែរថា មនុស្សចំនួន០៤នាក់ស្លាប់ និងចំនួន០៣នាក់ផ្សេងទៀតរងរបួសនៅយប់ថ្ងៃអាទិត្យក្នុងការវាយប្រហាររបស់សមាជិករដ្ឋអ៊ីស្លាមនៅទីតាំងយោធា។ ទីតាំងនោះគ្រប់គ្រងដោយកងកម្លាំងការពារសន្តិសុខ Sunni គាំទ្រដោយរដ្ឋាភិបាល ឬគេហៅថា ក្រុម Sahwa ឬកម្លាំង Awakening Council នៅក្នុងភូមិមួយនៅតំបន់ al-Radwaniyah ភាគនិរតីនៃទីក្រុងបាកដាដ៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី០៩ ខែវិច្ឆិកា ឆ្នាំ២០២០
