យោធាអ៊ីរ៉ាក់និយាយថា នៅថ្ងៃពុធ ទី១១ ម្សិលមិញនេះ សមាជិកក្រុមសកម្មប្រយុទ្ធរដ្ឋអ៊ីស្លាមចំនួន០៣នាក់ស្លាប់នៅក្នុងការវាយប្រហារតាមអាកាសរបស់កងកម្លាំងចម្រុះដឹកនាំដោយសហរដ្ឋអាមេរិកនៅក្នុងតំបន់ភ្នំមួយនៅភាគខាងជើងប្រទេសអ៊ីរ៉ាក់។
ការិយាល័យប្រព័ន្ធផ្សព្វផ្សាយនៃបញ្ជាការប្រតិបត្តិការចម្រុះអ៊ីរ៉ាក់និយាយថា យន្តហោះបារាំងធ្វើការវាយប្រហារតាមអាកាសលើទីតាំងលាក់ខ្លួនរបស់ឧទ្ទាម IS ចំនួន០៤កន្លែងនៅលើភ្នំ Qara-Chokh ក្បែរទីក្រុង Makhmour ចម្ងាយប្រមាណ៦០គីឡូម៉ែត្រភាគអាគ្នេយ៍នៃទីក្រុង Mosul ខេត្ត Nineveh ដោយបានបំផ្លាញកន្លែងលាក់ខ្លួន និងសម្លាប់សមាជិកសកម្មប្រយុទ្ធ IS ចំនួន០៣នាក់។
កម្លាំងប្រទេសបារាំងគឺជាផ្នែកមួយរបស់កម្លាំងចម្រុះអន្តរជាតិដឹកនាំដោយសហរដ្ឋអាមេរិកដែលមានភារកិច្ចជួយដល់កម្លាំងសន្តិសុខអ៊ីរ៉ាក់ប្រយុទ្ធប្រឆាំងនឹងសមាជិកក្រុមសកម្មប្រយុទ្ធ IS ដោយធ្វើប្រតិបត្តិការវាយប្រហារតាមអាកាសប្រឆាំងនឹងទីតាំងរបស់ឧទ្ទាមទាំងនោះក្នុងប្រទេសអ៊ីរ៉ាក់ និងប្រទេសស៊ីរី ក៏ដូចជាធ្វើការផ្តល់ឧបករណ៍យោធា និងការបណ្តុះបណ្តាលដល់កងកម្លាំងអ៊ីរ៉ាក់។
នៅក្នុងសេចក្តីថ្លែងការណ៍ដាច់ដោយឡែកមួយ លោក Yahia Rasoul អ្នកនាំពាក្យរបស់អគ្គមេបញ្ជាការនៃកងកំលាំងអ៊ីរ៉ាក់និយាយថា ក្រោយពីរយៈពេល ០៤ថ្ងៃនៃប្រតិបត្តិការវាយលុកដ៏ធំមួយប្រឆាំងនឹងក្រុមសកម្មប្រយុទ្ធ IS នៅតំបន់ភ្នំ Makhoul និង Khanogah កងកម្លាំងសន្តិសុខបានបំផ្លាញទីជម្រករបស់ IS ចំនួន ៥៦ទីតាំងហើយ ផ្លូវរូងក្រោមដីចំនួន ៤៥ របស់ក្រុមជ្រុលនិយមនិងដោះគ្រាប់បែកនៅតាមដងផ្លូវចំនួន ១០៦គ្រាប់។
គួរំលឹកផងដែរថា នៅថ្ងៃទី០៨ ខែវិច្ឆិកា កងកម្លាំងអ៊ីរ៉ាក់គាំទ្រដោយកម្លាំងចម្រុះដឹកនាំដោយសហរដ្ឋអាមេរិកបានចាប់ផ្តើមធ្វើការវាយលុក និងបន្តធ្វើប្រតិបត្តិការនៅរយៈពេលប៉ុន្មានថ្ងៃបន្ទាប់ដើម្បីតាមរកក្រុមសកម្មប្រយុទ្ធ IS នៅ Makhoul និង Khanogah៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី១២ ខែវិច្ឆិកា ឆ្នាំ២០២០
