នៅថ្ងៃពុធ ទី២៥ ម្សិលមិញនេះ មានមនុស្សចំនួន១៥នាក់រងរបួសនៅក្នុងហេតុការណ៍បំផ្ទុះគ្រាប់បែករថយន្តមួយនៅខាងក្រៅការិយាល័យប៉ូលិសនៅក្នុងទីក្រុង Kandahar រដ្ឋធានីនៃខេត្ត Kandahar នៅភាគខាងត្បូងប្រទេសអាហ្វហ្គានីស្ថាន។
ប្រភពព័ត៌មានពីសន្តិសុខទីក្រុងប្រាប់ភ្នាក់ងារព័ត៌មានដោយមិនបញ្ចេញឈ្មោះថា ឧប្បត្តិហេតុនេះកើតឡើងនៅម៉ោង១០និង៣០នាទីព្រឹកម៉ោងក្នុងស្រុកនៅពេលភេរវករបានជិះរថយន្តបង្កប់គ្រឿងផ្ទុះទៅកាន់ខ្លោងទ្វារចូលនៃអធិការដ្ឋាននគរបាលស្រុកទី១១ ហើយការផ្ទុះគ្រាប់បែកនេះក៏បានបង្កឱ្យមានការភិតភ័យ និងបំផ្លិចបំផ្លាញទីតាំងនោះផងដែរ ។
ការិយាល័យប៉ូលិសដែលមានទីតាំងនៅតំបន់ Dwahom Hino Mina រងការខូចខាតយ៉ាងខ្លាំងនៅក្នុងការវាយប្រហារនេះ។ អ្នករងរបួសរួមមានមន្ត្រីប៉ូលិសចំនួន ១១នាក់ និងជនស៊ីវិលចំនួន០៤នាក់។ ប្រភពព័ត៌មាននិយាយថា កម្លាំងនៃការផ្ទុះបានវាយបំបែកបង្អួច និងកញ្ចក់អគារជាច្រើន។
ស្របពេលជាមួយគ្នានេះដែរ លោក Jamal Barakzai អ្នកនាំពាក្យនៃស្នងការដ្ឋាននគរបាលខេត្តបញ្ជាក់ប្រាប់ភ្នាក់ងារព័ត៌មានថា មនុស្សចំនួន០៦នាក់រងរបួសក្នុងហេតុការណ៍នេះ។
រហូតមកដល់ពេលនេះមិនទាន់មានក្រុមណាមួយប្រកាសទទួលខុសត្រូវចំពោះការវាយប្រហារនេះនៅឡើយទេ។ នៅរយៈពេលប៉ុន្មានខែកន្លងមកនេះទីក្រុងធំៗនៅក្នុងប្រទេសអាហ្វហ្គានីស្ថានបានប្រឈមនឹងការវាយប្រហារភេរវកម្មពីសមាជិកក្រុមឧទ្ទាមតាលីបង់ និងក្រុមរដ្ឋអ៊ីស្លាម។
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី២៥ ខែវិច្ឆិកា ឆ្នាំ២០២០
