នៅថ្ងៃព្រហស្បតិ៍ ទី១០ ម្សិលមិញ ភេរវករ al-Shabab ចំនួន ១០នាក់ ត្រូវបានកងកម្លាំងសម្លាប់ក្នុងប្រតិបត្តិការវាយប្រហារតាមអាកាសមួយនៅភាគខាងត្បូងប្រទេសសូម៉ាលី។
ក្រសួងព័ត៌មានសូម៉ាលីនិយាយថា ការវាយប្រហារតាមអាកាសចំនួន០២លើក ធ្វើឡើងដោយមានកិច្ចសហប្រតិបត្តិការជាមួយមេបញ្ជាការអាហ្វ្រិក (Africom) កំណត់គោលដៅទៅលើរោងចក្រផលិតគ្រឿងផ្ទុះ និងកន្លែងស្តុកទុករបស់ក្រុមសកម្មប្រយុទ្ធ al-Shabab នៅជិតតំបន់ Jillib ។
មន្ត្រីក្រសួងនិយាយនៅក្នុងសេចក្តីថ្លែងការណ៍មួយនៅទីក្រុងម៉ូហ្គាឌីស្យូថា៖“ការវាយតម្លៃដំបូងបង្ហាញថា ការវាយប្រហារតាមអាកាសបានសម្លាប់សមាជិកសកម្មប្រយុទ្ធអាល់សាបាប (al-Shabab) ចំនួន ១០ នាក់” ។
ក្រសួងបន្ថែមថា រដ្ឋាភិបាលសហព័ន្ធនៃប្រទេសសូម៉ាលី ដោយមានការគាំទ្រពីអន្តរជាតិ បានបន្តដាក់សម្ពាធជាប្រចាំទៅលើសកម្មប្រយុទ្ធអាល់សាបាប ដើម្បីទប់ស្កាត់មហិច្ឆតារបស់ក្រុមនោះមិនឱ្យធ្វើការវាយប្រហារទាំងក្នុង និងក្រៅព្រំដែនរបស់ប្រទេសសូម៉ាលី។
ក្រុមជ្រុលនិយមត្រូវកងកម្លាំងបណ្តេញចេញពីទីក្រុងម៉ូហ្គាឌីស្យូក្នុងឆ្នាំ២០១១ ប៉ុន្តែពួកគេនៅតែបន្តធ្វើការគ្រប់គ្រងតាមតំបន់ជនបទធំៗ និងនៅតែបន្តធ្វើការគំរាមកំហែងចំពោះសន្តិភាពនៅក្នុងប្រទេសសូម៉ាលី ខណៈដែលសកម្មប្រយុទ្ធទាំងនោះធ្លាប់ធ្វើការវាយប្រហារនៅក្នុងប្រទេសសូម៉ាលី និងប្រទេសជិតខាងកេនយ៉ា៕
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី១១ ខែធ្នូ ឆ្នាំ២០២០
