ក្រសួងការពារជាតិអាល់ហ្សេរីលើកឡើងនៅក្នុងសេចក្តីថ្លែងការណ៍មួយថា នៅថ្ងៃអាទិត្យទី០៣ ខែមករា មានប្រតិបត្តិការប្រឆាំងភេវរកម្មមួយធ្វើឡើងនៅភាគពាយព្យនៃប្រទេសអាល់ហ្សេរីដោយបានសម្លាប់សមាជិកសកម្មប្រយុទ្ធសរុបចំនួន០២នាក់បន្ថែមទៀត និងបណ្តាលឲ្យទាហានចំនួន០១នាក់ស្លាប់។
នៅក្នុងសេចក្តីថ្លែងការណ៍បញ្ជាក់ថា នៅក្នុងប្រតិបត្តិការលើកទីពីរ(ថ្ងៃអាទិត្យ)នៃប្រតិបត្តិការស្វែងរកកងកម្លាំងបានកំចាត់ភេរវករចំនួន០២នាក់ ខណៈទាហានចំនួន០១នាក់ត្រូវភេរវករសម្លាប់នៅរសៀលថ្ងៃអាទិត្យ ។
សូមបញ្ជាក់ផងដែរថា អង្គភាពប្រឆាំងភេរវកម្មចាប់ផ្តើមធ្វើប្រតិបត្តិការស្រាវជ្រាវមួយនៅថ្ងៃសៅរ៍ ទី០២ ខែមករា ដើម្បីតាមដានក្រុមភេរវករមួយក្រុមក្នុងព្រៃក្រាស់នៅក្នុងទីក្រុង Messelmoun។ ទីក្រុងនោះស្ថិតនៅលើភ្នំក្នុងខេត្ត Tipaza ដែលមានចម្ងាយ៦៥គីឡូម៉ែត្រភាគខាងលិចទីក្រុង Algiers ក្នុងប្រទេសអាល់ហ្សេរី។ កងកម្លាំងបានសម្លាប់សមាជិកសកម្មប្រយុទ្ធចំនួន០២នាក់ ហើយក៏មានទាហានចំនួន០១នាក់ស្លាប់នៅក្នុងប្រតិបត្តិការនៅថ្ងៃសៅរ៍នោះផងដែរ។
ក្រសួងការពារជាតិប្រកាសថា សរុបមកនៅក្នុងប្រតិបត្តិការទាំងពីរថ្ងៃ មានភេរវករចំនួន០៤នាក់ត្រូវកងកម្លាំងបាញ់សម្លាប់ និងទាហានចំនួន០២នាក់ស្លាប់នៅក្នុងប្រតិបត្តិការប្រឆាំងភេរវកម្មនោះ៕
