កម្លាំងទ័ពរបស់ប្រទេសបួគីណាហ្វាសូ (Burkina Faso)និយាយថា នៅថ្ងៃសៅរ៍ ទី៩ ខែមករា មានការប៉ះទង្គិចគ្នាមួយកើតឡើងរវាងកម្លាំងទ័ពនិងសមាជិកសកម្មប្រយុទ្ធប្រដាប់អាវុធនៅភាគខាងជើងប្រទេស។ ហេតុការណ៍នោះសម្លាប់សមាជិកភេរវករចំនួន១១នាក់ និង
បណ្តាលឲ្យទាហានចំនួន១នាក់ស្លាប់។នេះបើយោងតាមសេចក្តីថ្លែងការណ៍មួយចេញផ្សាយនៅថ្ងៃអង្គារក្នុងទីក្រុង Ouagadougou ។
នៅក្នុងសេចក្តីរាយការណ៍បញ្ជាក់ថា ក្រុមប្រដាប់ដោយអាវុធមួយក្រុមបានធ្វើការវាយឆ្មក់លើការល្បាតរបស់កងទ័ពនៅក្នុងស្រុក Koumbri ភាគខាងជើងខេត្ត Yatenga បណ្តាលឱ្យទាហានចំនួន១នាក់ស្លាប់ និងចំនួន៦នាក់ផ្សេងទៀតរងរបួស។
នៅក្នុងប្រតិបត្តិការឆ្លើយតប កងកម្លាំងប្រដាប់អាវុធរបស់ប្រទេសបួគីណាហ្វាសូសម្លាប់អ្នកវាយប្រហារចំនួន១១នាក់នៅក្នុងចំណោមសមាជិករបស់ក្រុមប្រដាប់អាវុធដែលមិនទាន់ស្គាល់អត្តសញ្ញាណ។
គួររំលឹកផងដែរថា ចាប់តាំងពីឆ្នាំ២០១៥ មកប្រទេសបួគីណាហ្វាសូ( Burkina Faso) បាននិងកំពុងប្រឈមមុខក្នុងស្ថានភាពសន្តិសុខកាន់តែអាក្រក់ទៅៗ ដោយប្រឈមជាមួយនឹងការវាយប្រហារភេរវកម្មដែលបានសម្លាប់មនុស្សច្រើនជាងចំនួន១០០០នាក់ និងជាហេតុនាំឲ្យមនុស្សជាច្រើនពាន់នាក់ផ្សេងទៀតផ្លាស់ទីលំនៅ៕
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី១២ ខែមករា ឆ្នាំ២០២១
