កម្លាំងចម្រុះដឹកនាំដោយសហរដ្ឋអាមេរិក និងកងកម្លាំងអ៊ីរ៉ាក់នៅភាគខាងជើងប្រទេសអ៊ីរ៉ាក់ធ្វើការវាយប្រហារតាមអាកាសនៅថ្ងៃអង្គារ ទី០៩ ខែមីនា ឆ្នាំ២០២១ ដោយបានសម្លាប់សមាជិកឧទ្ទាម IS ចំនួន១២នាក់។
ការិយាល័យប្រព័ន្ធប្រតិបត្តិការ JOC លើកឡើងនៅក្នុងសេចក្តីថ្លែងការណ៍ខ្លីមួយថា ដោយមានកិច្ចសហការជាមួយបញ្ជាការប្រតិបត្តិការចម្រុះអ៊ីរ៉ាក់ (JOC) យន្តហោះរបស់កម្លាំងចម្រុះវាយប្រហារតាមអាកាសទៅលើទីលាក់ខ្លួនរបស់ឧទ្ទាមISនៅលើភ្នំ Adayah ភាគខាងជើងខេត្ត Nineveh ដោយបានសម្លាប់សមាជិកឧទ្ទាម IS ចំនួន១០នាក់។
សេចក្តីថ្លែងការណ៍បន្តថា ក្រោយមកទៀតកម្លាំងសន្តិសុខអ៊ីរ៉ាក់បានឆែកឆេរនៅទីតាំងវាយប្រហារនោះដោយបានរកឃើញសមាជិកឧទ្ទាម IS ចំនួន២នាក់ពាក់ខ្សែក្រវ៉ាត់ធ្វើអត្តឃាត និងបានសម្លាប់ពួកគេភ្លាម។
ប្រភពដដែលបន្ថែមថា យន្តហោះកម្លាំងចម្រុះវាយប្រហារតាមអាកាសមួយផ្សេងទៀត និងបំផ្លាញផ្លូវរូងក្រោមដីដែលឧទ្ទាម IS ប្រើប្រាស់នៅក្នុងតំបន់ al-Eithah ភាគខាងកើតនៃទីរួមខេត្ត Tikrit ដែលមានចម្ងាយប្រហែល១៧០គីឡូម៉ែត្រខាងជើងទីក្រុង Baghdad។
ភ្នំនានានិងតំបន់រឹងមាំនៅភាគខាងជើងនៃរដ្ឋធានីអ៊ីរ៉ាក់មានកំណើនសកម្មភាពរបស់សមាជិកឧទ្ទាមISក្នុងអំឡុងពេលប៉ុន្មានខែកន្លងមកនេះបើទោះបីជាមានប្រតិបត្តិការយោធាដើម្បីតាមប្រមាញ់ពួកគេក៏ដោយ។
យ៉ាងណាមិញស្ថានភាពសន្តិសុខនៅក្នុងប្រទេសអ៊ីរ៉ាក់មានភាពប្រសើរឡើងចាប់តាំងពីកងកម្លាំងសន្តិសុខអ៊ីរ៉ាក់កម្ចាត់សមាជិកISនៅទូទាំងប្រទេសនៅចុងឆ្នាំ២០១។ ទោះបីជាយ៉ាងណាក៏ដោយ សមាជិកឧទ្ទាម IS នៅសេសសល់បានបង្កប់ខ្លួននៅតាមទីប្រជុំជន ឬតំបន់វាលខ្សាច់ និងតំបន់រឹងមាំផ្សេងទៀតដោយធ្វើការវាយប្រហារឆ្មក់ជាញឹកញាប់ប្រឆាំងនឹងកម្លាំងសន្តិសុខ និងជនស៊ីវិល៕
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី០៩ ខែមីនា ឆ្នាំ២០២១