នៅថ្ងៃអង្គារ ទី០៩ ខែមីនា ប៉ូលិសតួកគីចាប់ឃុំខ្លួនមនុស្សចំនួន១៤នាក់នៅក្នុងទីក្រុង Istanbul និងចំនួន០១នាក់នៅភាគអាគ្នេយ៍នៃខេត្ត Hatay ពីបទមានជាប់ពាក់ព័ន្ធនឹងរដ្ឋអ៊ីស្លាម (IS)។
ភ្នាក់ងារព័ត៌មាន Anadolu ដែលគ្រប់គ្រងដោយរដ្ឋរាយការណ៍ថា ប្រតិបត្ដិការដំណាលគ្នាធ្វើឡើងនៅអាស័យដ្ឋានចំនួន១៨ក្នុងទីក្រុងIstanbulដើម្បីចាប់អ្នកដែលពាក់ព័ន្ធសកម្មភាពទាំងអស់ដែលតំណាងឲ្យឧទ្ទាម។ ជាមួយគ្នានេះដែរ ក្រសួងការពារជាតិតួកគីប្រកាសថា មនុស្សចំនួន១១នាក់ត្រូវបានចាប់ខ្លួននៅក្នុងស្រុក Altinozu នៃខេត្ត Hatay ខណៈពេលដែលឧទ្ទាមទាំងនោះកំពុងព្យាយាមឆ្លងដែនពីប្រទេសស៊ីរីចូលទៅក្នុងប្រទេសតួកគីដោយខុសច្បាប់។
ក្រសួងនិយាយថា គេកំណត់អត្តសញ្ញាណបានថា បុគ្គលម្នាក់ក្នុងចំណោមពួកគេជាក្រុមភេរវករ IS ដែលស្ថិតក្នុងបញ្ចីក្រហមតាមចាប់ខ្លួន។
គួររំលឹកផងដែរថា សមាជិកឧទ្ទាម IS ធ្វើការវាយប្រហារដ៏ឃោឃៅនៅក្នុងប្រទេសតួកគីចាប់តាំងពីឆ្នាំ២០១៥មក ហើយអង្គភាពប្រឆាំងភេរវកម្មតួកគីបានបើកប្រតិបត្តិការជាប្រចាំប្រឆាំងនឹងសមាជិកក្រុមនេះនៅក្នុងប្រទេស៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី០៩ ខែមីនា ឆ្នាំ២០២១