នាយកដ្ឋានសន្តិសុខផ្ទៃក្នុង (ISD) បាននិយាយកាលពីថ្ងៃពុធថា បុរសជនជាតិសិង្ហបុរីម្នាក់ត្រូវបានឃុំខ្លួនក្រោមច្បាប់សន្តិសុខផ្ទៃក្នុង (ISA) កាលពី ២ ឆ្នាំកន្លងមកពីបទចូលរួមក្នុងសង្គ្រាមស៊ីវិលយេម៉ែនត្រូវបានដោះលែងនិងដាក់ឱ្យស្ថិតនៅក្រោមបទបញ្ជារឹតត្បិត (RO) ។
លោក Sheik Heikel Khalid Bafana អាយុ ៤៩ ឆ្នាំបានស្ម័គ្រចិត្តកាន់អាវុធ និងធ្វើការជាភ្នាក់ងារដែលទទួលប្រាក់ឈ្នួលបរទេសតាមរយៈការប្រមូលព័ត៌មានស៊ើបការណ៍សម្ងាត់នៅយេម៉ែន។ ISD បាននិយាយថា គាត់ត្រូវបានគេដាក់ឱ្យស្ថិតនៅក្រោមបទបញ្ជារឹតត្បិត RO នៅក្នុងខែមីនា។
គួរបញ្ជាក់ផងដែរថា រាល់បុគ្គលដែលស្ថិតនៅក្រោមច្បាប់ RO មិនអាចធ្វើដំណើរចេញពីប្រទេសសិង្ហបុរី ឬផ្លាស់ប្តូរអាសយដ្ឋាន ឬការងារដោយគ្មានការយល់ព្រមនោះទេ។ ពួកគេមិនអាចចេញសេចក្តីថ្លែងការណ៍ជាសាធារណៈ ការប្រជុំសាធារណៈ ឬបោះពុម្ពចែកចាយ ឬចូលរួមចំណែកក្នុងការបោះពុម្ពផ្សាយណាមួយដោយគ្មានការយល់ព្រមផងដែរ៕
សម្រួល៖ សុផា
