លោក Hamed Bakayoko នាយករដ្ឋមន្ត្រី ប្រទេសកូតឌីវ័រស្លាប់ នៅមន្ទីរពេទ្យក្នុងប្រទេសអាល្លឺម៉ង់ នេះបើយោងតាមអាជ្ញាធរនិយាយ។
លោក Hamed Bakayoko ដែលកំពុងទទួលការព្យាបាលជំងឺមហារីកបានទទួលមរណភាព កាលពីថ្ងៃពុធនេះបន្ទាប់ពីថ្ងៃកំណើតនៃវ័យ៥៦ឆ្នាំរបស់គាត់។
លោកត្រូវបានតែងតាំងជានាយករដ្ឋមន្ត្រី កាលពីខែកក្កដា ឆ្នាំ២០២០ ក្រោយការស្លាប់ភ្លាមៗរបស់គាត់ លោក Amadou Gon Coulibaly នឹងឡើងកាន់តំណែងបន្ត។
ប្រធានាធិបតី Alassane Ouattara បានពណ៌នាពីលោក Hamed Bakayoko ក្នុងនាមជា“ រដ្ឋបុរសដ៏អស្ចារ្យ ដូចជាយុវជន និងជាបុរសស្មោះត្រង់។
លោក Bakayoko ត្រូវបានបញ្ជូនទៅប្រទេសបារាំង កាលពីខែកុម្ភៈ ដើម្បីធ្វើតេស្តិ៍វេជ្ជសាស្ត្រ ហើយក្រោយមកត្រូវបានផ្ទេរទៅប្រទេសអាល្លឺម៉ង់វិញ ដោយសារតែសុខភាពរបស់គាត់កាន់តែយ៉ាប់យ៉ឺន។
គាត់ជាអតីតនាយកប្រតិបត្តិសារព័ត៌មាន ដែលងាកទៅរកការធ្វើនយោបាយវិញ ក្នុងនោះគាត់បានដើរតួនាទីសម្របសម្រួលដ៏លេចធ្លោ នៅក្នុងសង្គ្រាមស៊ីវិលរបស់ប្រទេសកូតឌីវ័រ ក្នុងអំឡុងទសវត្សរ៍ដំបូងនៃសតវត្សរ៍នេះ។
“គាត់ជាតួអង្គសំខាន់ នៅក្នុងល្បែងនយោបាយ និងជាតួអង្គសំខាន់ក្នុងការផ្សះផ្សាជាតិផងដែរ។ តែនេះក៏ជាការបាត់បង់មួយផងដែរ” នេះបើតាមលោក Issiaka Sangare អ្នកនាំពាក្យនៃរណសិរ្សប្រជាប្រិយអ៊ីវ័របៀន ដែលបានប្រាប់ទីភ្នាក់ងារសារព័ត៌មាន AFP ។
ក្រៅពីតួនាទីជានាយករដ្ឋមន្ត្រី លោក Bakayoko ក៏ជារដ្ឋមន្ត្រីក្រសួងការពារប្រទេសផងដែរ។
សូមបញ្ជាក់ថា លោក Patrick Achi ត្រូវបានតែងតាំងជានាយករដ្ឋមន្ត្រីបណ្តោះអាសន្នខណៈពេលដែលលោក Tene Birahima Ouattara ជាប្អូនប្រុសរបស់ប្រធានាធិបតីត្រូវបានតែងតាំងជារដ្ឋមន្ត្រីការពារជាតិបណ្តោះអាសន្ន៕
ប្រែសម្រួល៖ ឱក សុវណ្ណារ័ត្ន
ប្រភពព័ត៌មាន BBC ចុះផ្សាយថ្ងៃទី១១ ខែមីនា ឆ្នាំ២០២១
