ក្រសួងការបរទេសបាននិយាយនៅថ្ងៃសុក្រនេះថាប្រទេសកូរ៉េខាងត្បូងនឹងផ្អាកការដោះដូរការការពារជាតិជាមួយប្រទេសមីយ៉ាន់ម៉ា និងហាមឃាត់ការនាំចេញអាវុធទៅកាន់ប្រទេសនេះបន្ទាប់ពីរដ្ឋប្រហារយោធា និងការបង្ក្រាបដោយហិង្សាលើបាតុកម្មគាំទ្រទៅលើលទ្ធិប្រជាធិបតេយ្យ។
ក្រសួងក៏បាននិយាយផងដែរថាទីក្រុងសេអ៊ូលនឹងកំណត់ការនាំចេញនូវមុខទំនិញយុទ្ធសាស្ត្រផ្សេងទៀត និងពិចារណាឡើងវិញនូវជំនួយអភិវឌ្ឍន៍ និងផ្តល់ការលើកលែងខាងមនុស្សធម៌សម្រាប់ជនជាតិមីយ៉ាន់ម៉ាដើម្បីអនុញ្ញាតឱ្យពួកគេស្នាក់នៅក្នុងប្រទេសកូរ៉េរហូតដល់ស្ថានភាពប្រសើរឡើង។
ក្រសួងបាននិយាយនៅក្នុងសេចក្តីថ្លែងការណ៍មួយថា“ ទោះបីជាមានការទាមទារម្តងហើយម្តងទៀតពីសហគមន៍អន្តរជាតិរួមទាំងកូរ៉េខាងត្បូងក៏ដោយ ក៏មានចំនួនជនរងគ្រោះនៅក្នុងប្រទេសមីយ៉ាន់ម៉ាកើនឡើងដោយសារតែអំពើហិង្សារបស់អាជ្ញាធរយោធា និងប៉ូលិស” ។
ការនាំចេញផ្នែកការពារជាតិចុងក្រោយពីកូរ៉េខាងត្បូងទៅកាន់ប្រទេសមីយ៉ាន់ម៉ាគឺនៅឆ្នាំ ២០១៩ ប៉ុន្តែទីក្រុងសេអ៊ូលនៅតែចំណាយរាប់លានដុល្លារលើគម្រោងអភិវឌ្ឍន៍នៅក្នុងប្រទេសនេះ នេះបើយោងតាមទិន្នន័យដែលបានដាក់ជាមួយគំនិតផ្តួចផ្តើមតម្លាភាពជំនួយអន្តរជាតិ។ សេចក្តីថ្លែងការណ៍បាននិយាយថារដ្ឋាភិបាលកូរ៉េខាងត្បូងនឹងពិចារណាឡើងវិញនូវកិច្ចសហប្រតិបត្តិការអភិវឌ្ឍន៍ដែលមិនបានបញ្ជាក់ច្បាស់ជាមួយប្រទេសមីយ៉ាន់ម៉ា ប៉ុន្តែនឹងបន្តគម្រោងដែលមានទំនាក់ទំនងដោយផ្ទាល់ទៅនឹងជីវភាពរស់នៅរបស់ប្រជាជនមីយ៉ាន់ម៉ានិងជំនួយមនុស្សធម៌។
ក្រុមសកម្មជនមីយ៉ាន់ម៉ាបានធ្វើការប្រមូលផ្តុំគ្នាជាច្រើនទៀតនៅថ្ងៃសុក្រមួយថ្ងៃបន្ទាប់ពីក្រុមសិទិ្ធមនុស្សបាននិយាយថាកងកំលាំងសន្តិសុខបានសម្លាប់ក្រុមបាតុករ ១២ នាក់ដែលអំពាវនាវអោយមានការវិលត្រឡប់ទៅកាន់លទ្ធិប្រជាធិបតេយ្យឡើងវិញ៕
សម្រួល៖ សុផា
