សកម្មជនមីយ៉ាន់ម៉ាបានធ្វើការប្រមូលផ្តុំគ្នាជាច្រើនទៀតនៅថ្ងៃសុក្រ (១២ មីនា) មួយថ្ងៃបន្ទាប់ពីក្រុមសិទិ្ធមនុស្សបាននិយាយថា កងកំលាំងសន្តិសុខបានសំលាប់ក្រុមបាតុករ ១២ នាក់ និងនៅពេលមេធាវីរបស់មេដឹកនាំលោកស្រីអ៊ុងសានស៊ូជីបានសើចចំអកការចោទប្រកាន់សូកប៉ាន់ថ្មីប្រឆាំងនឹងលោកស្រីនោះ។
ការតវ៉ាត្រូវបានធ្វើឡើងនៅទីក្រុងយ៉ាំងហ្គោនដែលជាទីក្រុងធំបំផុតរបស់មីយ៉ាន់ម៉ា និងទីប្រជុំជនជាច្រើនទៀតនៅថ្ងៃសុក្រនេះ នេះបើយោងតាមរូបថតដែលបានបង្ហោះនៅលើបណ្តាញសង្គមដោយសាក្សី និងអង្គការសារព័ត៌មានក្នុងស្រុក។ វានៅមិនទាន់មានសេចក្តីរាយការណ៍ភ្លាមៗអំពីអំពើហិង្សាទេ។
ប្រទេសនៅតំបន់អាស៊ីអាគ្នេយ៍មួយនេះបានជួបវិបត្តិចាប់តាំងពីកងទ័ពបានបណ្តេញរដ្ឋាភិបាលដែលបានជាប់ឆ្នោតរបស់លោកស្រីអ៊ុងសានស៊ូជីនៅក្នុងរដ្ឋប្រហារថ្ងៃទី ១ ខែកុម្ភះដោយបានឃុំខ្លួនលោកស្រី និងមន្ត្រីជាច្រើនរូបនៃគណបក្សសម្ព័ន្ធជាតិដើម្បីលទ្ធិប្រជាធិបតេយ្យរបស់លោកស្រីនិ ងបង្កើតរបបយោធាដែលគ្រប់គ្រងដោយឧត្តមសេនីយ៍ជាច្រើនរូបថែមទៀត។
អ្នកនាំពាក្យយោធាលោកឧត្តមសេនីយ៍ត្រី Zaw Min Tun បាននិយាយនៅថ្ងៃព្រហស្បតិ៍នេះថា លោកស្រីអ៊ុងសានស៊ូជីបានទទួលយកការបង់ប្រាក់ខុសច្បាប់ដែលមានតម្លៃ ៦០ ម៉ឺនដុល្លារក៏ដូចជាមាសផងដែរ។ ការបន្ថែមការចោទប្រកាន់ពីបទពុករលួយទៅនឹងការចោទប្រកាន់ប្រឆាំងនឹងលោកស្រីអ៊ុងសានស៊ូជីអាចមានន័យថាលោកស្រីប្រឈមនឹងការពិន័យកាន់តែធ្ងន់ធ្ងរ។ បច្ចុប្បន្នលោកស្រីប្រឈមនឹងការចោទប្រកាន់តិចតួចចំនួន ៤ ករណីរួមទាំងការនាំចូលអាយកូមចំនួន ៦ ដោយខុសច្បាប់ និងការរឹតត្បិតការឆ្លងមេរោគកូរ៉ូណាថែមទៀត៕
សម្រួល៖សុផា
