អង្គការសហប្រជាជាតិកាលពីថ្ងៃអង្គារ (១៦ មីនា) បានសម្តែងនូវការព្រួយបារម្ភចំពោះការកើនឡើងនៃការស្លាប់នៅក្នុងប្រទេសមីយ៉ាន់ម៉ាចាប់តាំងពីរដ្ឋប្រហារថ្ងៃទី ១ ខែកុម្ភៈដោយព្រមានថា ក្រុមអ្នកតវ៉ាដែលត្រូវបានឃុំខ្លួនកំពុងប្រឈមមុខនឹងការធ្វើទារុណកម្មហើយមនុស្សរាប់រយនាក់បានបាត់ខ្លួន។
អ្នកនាំពាក្យការិយាល័យសិទ្ធិមនុស្សអង្គការសហប្រជាជាតិ លោកស្រី Ravina Shamdasani បានប្រាប់ក្រុមអ្នកយកព័ត៌មានថាចំនួនអ្នកស្លាប់បានកើនឡើងយ៉ាងខ្លាំងក្នុងរយៈពេលមួយសប្តាហ៍កន្លងមកនៅក្នុងប្រទេសមីយ៉ាន់ម៉ាជាទីដែលកម្លាំងសន្តិសុខបានប្រើប្រាស់កម្លាំងដ៍សាហាវប្រឆាំងនឹងក្រុមអ្នកតវ៉ា។
លោកស្រីបានមានប្រសាសន៍ថា មនុស្សសរុបចំនួន ១៤៩ នាក់បានស្លាប់នៅក្នុងការបង្ក្រាបការតវ៉ាចាប់តាំងពីថ្ងៃទី ១ ខែកុម្ភៈ ប៉ុន្តែលោកស្រីបានសង្កត់ធ្ងន់ថាចំនួនពិតប្រាកដគឺពិតជាខ្ពស់ជាងនេះ។យោងតាមសមាគមជំនួយសម្រាប់អ្នកទោសនយោបាយ (AAPP) អោយដឹងថា មនុស្សជាង ១៨០ នាក់ត្រូវបានសម្លាប់រួមទាំងមនុស្ស ៧៤ នាក់ដែលបានស្លាប់នៅថ្ងៃអាទិត្យនេះ។
ក្រៅពីការសម្លាប់នេះ លោកស្រី Shamdasani បានព្រមានថាកម្លាំងសន្តិសុខកំពុងបន្តចាប់ខ្លួន និងឃុំខ្លួនមនុស្សនៅទូទាំងប្រទេសដោយបំពានហើយបច្ចុប្បន្ននេះយ៉ាងហោចណាស់មានមនុស្សចំនួន ២,០៨៤ នាក់កំពុងត្រូវបានឃុំខ្លួន។ លោកស្រីបាននិយាយថា“ របាយការណ៍ដែលគួរឱ្យព្រួយបារម្ភយ៉ាងខ្លាំងនៃការធ្វើទារុណកម្មនៅក្នុងមន្ទីរឃុំឃាំងក៏បានលេចចេញមកផងដែរ”៕
សម្រួល៖ សុផា
