ហេតុការណ៍ផ្ទុះមួយវាយប្រហារទីក្រុង Chaman ភាគនិរតីប្រទេសរបស់ប្រទេសប៉ាគីស្ថាននៅថ្ងៃអង្គារនេះបណ្តាលឱ្យមនុស្សចំនួន៤នាក់ស្លាប់ រួមទាំងកុមារចំនួន១នាក់ និងមនុស្សចំនួន១៤នាក់ផ្សេងទៀតរងរបួស។
មន្ត្រីប៉ូលិសនៅក្នុងតំបន់នោះប្រាប់បណ្តាញសារព័ត៌មានក្នុងស្រុកថា រថយន្តមួយគ្រឿងរបស់កងកម្លាំងប៉ាគីស្ថានរងការវាយប្រហារពីហេតុការណ៍បំផ្ទុះនៅតំបន់Taj Road ក្នុងទីក្រុង Chaman ដែលមានព្រំប្រទល់ជាប់ប្រទេសអាហ្គានីស្ថាន។
ទោះជាយ៉ាងណា ក្រុមមន្ត្រីពុំបានបញ្ជាក់ថា មានបុគ្គលិកសន្តិសុខណាម្នាក់ស្លាប់ ឬរងរបួសនៅក្នុងការផ្ទុះនោះទេ។ ប៉ូលិសនិយាយថា គ្រាប់បែកនោះត្រូវបានគេដាក់នៅលើម៉ូតូដែលចតនៅក្បែររថយន្តហើយវាត្រូវបានបំផ្ទុះដោយប្រើប្រាស់ឧបករណ៍បញ្ជាពីចំងាយ។ ក្រោយពីមានការផ្ទុះកើតឡើង ក្រុមអ្នកជួយសង្គ្រោះ ប៉ូលិស និងកងកម្លាំងសន្តិសុខបានប្រញាប់ប្រញាល់ទៅកាន់ទីតាំងកើតហេតុ និងបានបញ្ចូនសព រួមទាំងអ្នករងរបួសទៅកាន់មន្ទីរពេទ្យនៅក្បែរទីតាំងផ្ទុះដោយអ្នករងរបួសមួយចំនួនស្ថិតក្នុងស្ថានភាពធ្ងន់ធ្ងរ។
ប៉ូលិស និងកងកម្លាំងសន្តិសុខបានឡោមព័ទ្ធតំបន់នោះ រួមទាំងបើកប្រតិបត្តិការស្រាវជ្រាវដើម្បីចាប់ខ្លួនជនល្មើស។ រហូតមកដល់ពេលនេះ ពុំទាន់មានក្រុម ឬបុគ្គលណាមួយបានអះអាងទទួលខុសត្រូវលើការវាយប្រហារនោះទេ៕
ប្រែសម្រួល៖ប៉ោក លក្ខិណា
ប្រភពព័ត៌មាន xinhuanet ចុះផ្សាយថ្ងៃ២៤ ខែមីនា ឆ្នាំ២០២១
