ការិយាល័យជនអន្តោប្រវេសន៍ហ្វីលីពីន (BI) កំពុងស៊ើបអង្កេតការចោទប្រកាន់ដែលថាមន្ត្រីរបស់ខ្លួនមួយចំនួនបានជាប់ពាក់ព័ន្ធនឹងការជួញដូរស្ត្រីចំនួន ៤៤ នាក់ទៅធ្វើការនៅប្រទេសស៊ីរី។ ការស៊ើបអង្កេតរបស់ព្រឹទ្ធសភាទៅក្នុងផែនការជួញដូរមនុស្សត្រូវបានគេប្រាប់ថាស្ត្រីទាំងនោះបានធ្វើដំណើរតាមទិដ្ឋាការទេសចរណ៍ពីប្រទេសហ្វីលីពីនទៅប្រទេសឌូបៃដែលជាកន្លែងដែលពួកគេត្រូវបានគេសន្យាថានឹងធ្វើការនៅទីនោះ។
សមាជិកព្រឹទ្ធសភា Risa Hontiveros ដែលកំពុងដឹកនាំការស៊ើបអង្កេតបាននិយាយថា បន្ទាប់មកពួកគេត្រូវបានចាក់សោនៅខាងក្នុងអន្តេវាសិកដ្ឋានងងឹត និងកខ្វក់ ហើយពួកគេត្រូវដាក់អោយដេកនៅលើឥដ្ឋ។ បន្ទាប់ពីទិដ្ឋាការ ៣០ ថ្ងៃរបស់ពួកគេផុតកំណត់ ស្ត្រីទាំងនោះត្រូវបានបង្ខំឱ្យទៅក្រុងដាម៉ាសជាកន្លែងដែលពួកគេត្រូវបានលក់ទៅឱ្យនិយោជិកក្នុងតម្លៃច្រើនបំផុត ១០.០០០ ដុល្លារអាមេរិក។
កាលពីសប្តាហ៍មុន លោក Hontiveros បាននិយាយថា “មន្ត្រីអន្តោប្រវេសន៍របស់យើងហាក់ដូចជាកំពុងបញ្ជូនស្ត្រីរបស់យើងជាលក្ខណៈទាសករ” ។ ក្រសួងការបរទេសបាននិយាយកាលពីខែមុនថា មនុស្សជាច្រើននាក់បានភៀសខ្លួនទៅកាន់ស្ថានទូតហ្វីលីពីននៅក្នុងរដ្ឋធានីរបស់ប្រទេសស៊ីរីដោយសារលក្ខខណ្ឌការងារលំបាកនៅក្នុងប្រទេសនេះ៕
សម្រួល៖ សុផា
