កងកម្លាំងអ៊ីស្រាអែលនៅថ្ងៃពុធ ទី២៤ ខែមីនានេះបានចាប់ខ្លួនជនជាតិប៉ាឡេស្ទីនចំនួន ២៧នាក់ដោយក្នុងនោះមានមេដឹកនាំរបស់ចលនាតស៊ូអ៊ីស្លាមប៉ាឡេស្ទីន (Hamas) ចំនួន ២នាក់ផងដែរនៅក្នុងតំបន់ West Bank។
ប្រភពព័ត៌មានពីមន្ទីឃុំអ្នកទោសប៉ាឡេស្ទីនបានឲ្យដឹងក្នុងសេចក្តីថ្លែងការណ៍មួយថា កងកម្លាំងអ៊ីស្រាអែលធ្វើប្រតិបត្តិការចាប់ខ្លួននៅក្នុងទីក្រុង Ramallah ទីក្រុងJenin ទីក្រុង Bethlehem និងតំបន់ខាងកើតក្រុង Jerusalem។ សេចក្តីថ្លែងការណ៍បញ្ជាក់ថា“លោក Jamal al-Taweel និង Bajes Nakhla ដែលជាមេដឹកនាំជាន់ខ្ពស់របស់ក្រុម Hamas ទាំងពីរនាក់ត្រូវបានចាប់ខ្លួនពីផ្ទះរបស់ពួកគេនៅជិតក្រុង Ramallah”។
ក្រុម Hamas ធ្វើការថ្កោលទោសលើការចាប់ខ្លួនមេដឹកនាំរបស់ពួកគេនៅតំបន់ West Bank ដោយបន្ថែមថា ការចាប់ខ្លួនទាំងនោះនឹងមិនអាចរារាំងការប្តេជ្ញាចិត្តរបស់ពួកគេក្នុងការចូលរួមការបោះឆ្នោតដែលគ្រោងនឹងធ្វើឡើងនៅថ្ងៃទី២២ ខែឧសភានោះទេ។
នៅព្រឹកថ្ងៃពុធ យន្តហោះចម្បាំងអ៊ីស្រាអែលបានធ្វើការវាយប្រហារតាមអាកាសទៅលើទីតាំងយោធាដែលជាកម្មសិទ្ធិរបស់ក្រុមសកម្មប្រយុទ្ធ Hamasនៅភាគខាងជើង និងភាគកណ្តាលតំបន់ Gaza Strip នេះបើយោងតាមប្រភពព័ត៌មានពីក្រុម Hamas។
ប្រភពព័ត៌មានពីក្រុម Hamas អះអាងបន្ថែមថា គ្រាប់រ៉ុក្កែត និងមីស៊ីលដែលយន្តហោះចម្បាំងអ៊ីស្រាអែលបាញ់នោះពុំបណ្តាលឲ្យមនុស្សណាម្នាក់រងរបួសឡើយ។ ប៉ុន្តែមានការខូចខាតធ្ងន់ធ្ងរកើតឡើងនៅទីតាំងមួយចំនួនក្នុងតំបន់ Gaza Strip ។
ចំណែកឯប្រភពព័ត៌មានពីយោធាអ៊ីស្រាអែលបានឲ្យដឹងថា ការវាយប្រហារនោះធ្វើឡើងដើម្បីសងសឹកទៅនឹងការបាញ់រ៉ុក្កែតមួយនៅភាគខាងត្បូងប្រទេសអ៊ីស្រាអែលនៅយប់ថ្ងៃអង្គារ៕
ប្រែសម្រួល៖ប៉ោក លក្ខិណា
ប្រភពព័ត៌មាន xinhuanet ចុះផ្សាយថ្ងៃទី២៥ ខែមីនា ឆ្នាំ២០២១
